CEBU, Philippines - Nasikop sa mga tinugyanan sa balaod ang 28-anyos nga lalaki nga giingong tigbuhat ug namaligya og peke nga kwartang papel sa dalan Colon sa Siyudad sa Sugbo kagahapon sa udto.
Si Junrey Cagay, taga Barangay Quiot ning siyudad nadakpan atol sa gipahigayong buy-bust operation sa mga sakop sa Bangko Sentral ng Pilipinas (BSP) ug kapolisan.
Matud sa representante sa BSP nga si “Agent Miles,” ang maong operasyon resulta sa ilang kapin usa ka semana nga pagpahigayon og surveillance human sila makadawat og impormasyon nga naghitak ang pagbuhat og peke nga kwarta dinhi sa dakbayan sa Sugbo.
Dugang ni Agent Miles, sa una nilang transaksyon kang Cagay, wala kini magdala og peke nga kwarta maong nagpadayon ang ilang surveillance.
Kagahapon sa udto dihang subli silang nagkita, hingpit nga gidakop si Cagay ug nakuha gikan kaniya ang mga counterfeit bank notes o mga peke nga kwartang papel.
Ang maong joint operation gilangkuban sa BSP Investigation Division, Regional Intelligence Unit-7 ug Carbon Police Station, diin anaa karon gibalhug si Cagay.
Matud sa dinakpan nga dili pa siya dugay nga nanghimo og peke nga kwarta ug matud pa, buhaton niya kini sa computer shop ug ipa-print.
Giingong walay nagtudlo kaniya niini ug igo lang siyang nag-research sa pagbuhat niini ug dili na unta siya mopadayon sa pagbuhat apan ang iyang customer maoy midasig kaniya nga mohimo pa.
Ang baligya niya sa peke nga kwarta ang tag P100, P200 ug P500 mapalit sa kantidad nga P20 ug ang P1,000 ibaligya niya sa kantidad nga P50. Ang pamaagi sa pagbaligya niini, siya maoy muadto mismo sa iyang mga costumer.
Subay niini, si Agent Miles miingon nga ang operasyon nga ilang gihimo gitumong aron mahunong na ang ingon niining binuhatan.
Gihulagway usab niya nga gikinahanglan nila ang tabang sa katawhan aron dili maghitak ang peke nga kwarta ug importante usab ang information dissemination kun unsaon nga mahibaw-an nga peke ang kwarta.
“Tingnan natin yung bank notes, kapain natin, so if it’s rough to the touch its an indicator that it’s a genuine bank notes, if it’s smooth to the touch yun po yung pekeng bank notes kasi po kadalasan yung counterfeiters natin ngayon gumagamit lang nang commercially available papers like bondpapers minsan yung onion papers”, sigon ni Agent Miles.
Samtang si Cebu City Councilor Dave Tumulak, ang deputy mayor for police matters, miasoy nga sukad pa niadtong buwan sa Disyembre daghan na og reklamo mahitungod sa peke nga kwarta nga mikatap sa siyudad.
Gitaw sa konsehal nga dili lang kay si Cagay ang sikupon sa otoridad apan lakip na ang tindahan nga nagprinta gyud niini kay dako man kini og tulubagon. Siya midugang nga sindikato ang naghimo sa maong mga peke nga kwarta.
“Dunay investigation nga gihimo sa pagkakaron ang atong kapolisan kay dili ta makatugot nga ang atong siyudad sa Sugbo masudlan niiining counterfeit money kay usa kini ka makadaot sa atong ekonomiya unya nag-angat na sad ra ba ang atong barangay election dili ta gusto simbako mao unya ni ang gamiton. So, ato ning gipugngan gyud,” matud ni Tumulak.
Gihimug-atan sa BSP nga aduna silay gihimo aron dili dali nga makopya ang bag-ong kwarta ug gani adunay 13 ka security measures ang new bank notes. Kini maoy hinungdan nga nag-demonetize sila aron i-upgrade ang security measures niini.
Si Cagay mag-atubang og kasong kalapasan sa Article 168 sa Revised Penal Code, kon illegal possession ug paggamit og pekeng kwarta diin ang silot niini, unom ngadto sa napulo ka tuig nga pagkabilanggo. Decemay P. Padilla (BANAT NEWS)