Pagpangandam

CEBU, Philippines - Ang pangulo sa Cebu City Disaster Risk-Reduction Management Office (CCDRRMO) Nagiel Bañacia miingon nga ang siyudad sa Sugbo angay gayud nga mangandam kay nag-atubang kini og mga katalagman sama sa baha, landslide ug sunog.

Kini maoy ilang tutukan pag-ayo og gamitan sa calamity fund. Ang balaod naglatid nga 5% sa kinatibuk-ang budget sa usa ka Local Government Unit (LGU) itagana gayud alang sa calamity expenses.

Ang konseho sa dakbayan mipasar og P146 milyones alang sa Infrastructure Site Acquisition and Evacuation diin dinhi kuhaon ang pundo aron matubag ang suliran nga giatubang sa dakbayan.

Kagahapon, ang tsirman sa Committee on Social Services nga si Konsehal Joey Daluz III nagpatawag og tigum nga gitambongan sa pipila ka mga barangay kapitan, lakip na sa representante sa Department of Interior and Local Government, aron malamdagan ang siyudad sa mga angayang buhaton sa calamity budget.

“Ang P146 million dako na kaayo ta og mahimo niana, so I’m expecting the Disaster Council headed by Nagiel Bañacia to submit to us the breakdown of P146 million, mga priority”, sigon ni Konsehal Daluz.

Nasayran nga gawas sa P146 milyones, may laing P25 milyones nga budget alang sa expenses sa Emergency Medical Services (EMS) ug fire volunteers ug laing P30 milyones alang sa administration and operations.

Gitinguha sa Disaster Team nga i-upgrade ang mga ambulansiya sa siyudad subay sa standard sa Department of Health.

Talisay nangandam sab

Ang kagamhanan sa dakbayan sa Talisay nangandam na’ng daan aron maalkontrahan nila ang kapeligro kun mahitabo nga may kusog nga uwan karong adlawa ug makamugna’g paglunop sa kabarangayan sa ilang siyudad.

Si Alvin Santillana, disaster risk-reduction and management officer sa Talisay, mipahimangno sa katawhan nga magmabinantayon, ilabi na kadtong mga namuyo duol sa mga baybayon ug kasapaan.

Ang presidente sa Association of Barangay Council (ABC) nga si Konsehal Raul Cabanero miingon nga panahon na nga angayang tutukan ang pagpangita og relocation site alang sa mga nagpuyo kilid sa kasapaan ug kabaybayonan.

Samtang usa ka lawom nga bangag sa yuta ang nadiskobrehan didto sa lungsod sa Alcantara human sa sagunson nga pag-ulan sa milabay’ng mga adlaw. Nadiskobrehan ang bangag sa Barangay Lawaan nga may gidak-on nga mura’g balde.

Adunay labing menos 12 ka landslide nga nahitabo sa lainlaing dapit sa probinsya sa Sugbo, sama  didto sa Pinamungajan, Sibonga, Barili, Alcantara, Sogod, Tabogon, Aloguinsan, Dumanjug, Balamban, Barili ug sa dakbayan sa Bogo ug Naga. Le Phyllis F. Antojado, Decemay P. Padilla, Rowena Capistrano, Gabriel C. Bonjoc (BANAT NEWS)