Opisyal sa AFP gikOnbikto sa Ombudsman kay kurakot

CEBU, Philippines - Gikunbikto sa Ombudsman sa kasong kalapasan sa Section 3 (e) sa Akta Republika No. 3019 kon “Anti-Graft and Corrupt Practices Act” ug Malversation ubos sa Article 217 sa Revised Penal Code  ang usa ka military officer.

Ang nakonbikto mao si Engineer Dante Senen, Supply Accountable Officer sa Armed Forces of the Philippines (AFP) Military Supply Unit nga nagbase sa dakbayan sa Sugbo.

Si Senen gidid-an usab nga makatrabaho pa sa bisan asang buhatan sa gobiyerno ug gimanduan sa pag-uli sa P1.2 milyones ngadto sa gobiyerno gawas niini gimanduan usab siya sa pagbayad og multa nga P1.2 milyones.

Ang maong kaso kalabutan sa giingong pagbaligya sa upat ka power generators ngadto sa ubos nga presyo.  Ang maong power generator giingong nagkantidad og P1.2 milyones ug gibaligya og P800 mil nga walay public bidding.

Isip silot sa iyang kalapasan, si Senen mabilanggo sulod sa unom ngadto sa 10 ka tuig sa kasong graft ug 10 ngadto sa 18 ka tuig sa malversation. Ang mga prosecutor sa Ombudsman mipasaka og kaso ngadto sa Sandiganbayan batok kang Senen niadtong tuig 2005.

Lakip sa napasakaan og kaso si kanhi Philippine Air Force (PAF) Brigadier General Vladimir delos Trino, Major Antonio Jason Garcia ug Antonio Ularte sa Eduard Enterprises.

Atol sa pagdungog sa kaso si Senen giingong wala kini motunga ug nasikop niadtong Nobiyembre 21, 2011 didto sa Camp Aguinaldo, Quezon City unom ka buwan human nakonbikto sa anti-graft court si delos Trino ug Garcia. Samtang si Ularte padayong nagtago-tago.

Nunot niini, si Senen maoy accountable officer in charge sa generators nga gipamaligya ngadto kang Ularte ug ang halin sa maong mga butang nahanaw. Sa 20 ka pahinang decision ni Associate Justice Samuel Martires nasuta sa anti-graft court nga ang mga ebidensiyang gipresentar igo kini nga mag-aproba nga adunay nahimong kalapasan ang akusado.

Matud ni Martires nga kun si Senen inosente o walay kalibutan sa plano ni delos Trino ug Garcia misumbong unta dayon kini sa insidente ngadto sa iyang commanding officer aron mapugngan ang pagbaligya sa generators.

Niadtong Mayo, 2011 ang Sandiganbayan mikonbikto kang delos Trino ug Garcia sa kasong graft.

Ubos sa decision niadtong tuig 2011 nasuta sa korte nga naestablisar sa prosekusyon ang ilegal nga pagbaligya sa upat ka generators diin ang PAF ug AFP naalkanse og P1.2 milyones nga revenue. (BANAT NEWS)