‘Devotee city’ gibuksan na

CEBU, Philippines - Hingpit na nga gibuksan kagahapon ang Devotee City nga gitambungan sa mga opisyal sa Siyudad sa Sugbo.

Mokabat sa 40 ka 20-footer container vans sa 2GO ang gihimo nga kapuy-an sa mga dumuduong sulod sa lima ka adlaw subay sa kasaulogan sa Piyesta Senyor.

Unang higayon nga ang Kapitolyo nga motabang sa paghan-ay sa Devotee City pinaagi sa paghatag og medical ug emergency assistance sa mga namuyo.

Si Gobernador Hilario Davide III nitug-an nga ang Cebu Provincial Police Office mohatag sab og unom ka polis matag adlaw aron motabang sa seguridad sa lugar.

Udto kagahapon aduna nay 25 ka tawo ang nagpuyo sa Devotee City nga maka-akomodar og 3,000 ka tawo.

Ipakita lang sa mga gustong mopuyo ang ilang tiket sa bus ug barko gikan sa layo nga lugar.

Sa tuig 2015, niabot og 2,486 ang nipuyo sa Devotee City ug nisaka kini sa 2,865 sa 2016.

Ang kagamhanan sa siyudad nakig-alayon sa mga pribadong sektor aron mahimong hapsay ug nindot nga puy-an ang Devotee City.

Gawas sa mga emergency responders ug medical services nga ihatag sa Kapitolyo, sila sab ang gitahasan alang sa kalingawan matag gabii. Tungod kay dunay hulga sa seguridad hugot sab nga gibantayan sa siyudad ang Devotee City pinaagi sa pagpakatap og mga polis.

Dili na mohatag og pagkaon ang siyudad sa mga mamuyo sa Devotee City sanglit dunay feeding program nga himoon ang nagkalain-laing grupo nga nisuporta sa maong proyekto.

Ang Metropolitan Cebu Water District maoy mobutang sa tubig sa Devotee City.

Matud sa tigpamaba sa MCWD, Charmaine Rodriguez-Kara, nga giandam nila ang tubig mainom, pangluto, panghugas ug pangkaligo.

Ang Devotee City molungtad hangtud sa Lunes apan kutob lang sa udto sanglit iuli man dayon ang mga giabangang container vans inig ka gabii. (BANAT NEWS)