CEBU, Philippines - Gihatagan og mga community toilet sa kagamhanan sa probinsiya sa milabay’ng adlaw ang Sitio Magsaysay, Brgy. Sunog, lungsod sa Balamban.
Kini aron paglikay sa pagkuyanap sa sakit nga dala sa kontaminasyon ug nakapahugaw sa tinubdan nila sa tubig nga mainom.
Ubay-ubay na ang mga nabiktima sa kalibanga kasagaran diha sa mga bukirang barangay tungod sa kagaw gikan sa hugaw sa tawo ug mananap. Kasagaran sa mga residente sa bukirang barangay walay mga pansayan. Ang ilang mga hugaw mosagol sa tubig nga ilang gamiton labi na kung ting-uwan.
Ang Provincial Disaster Risk Reduction and Management Office (PDRRMO) nga gipangulohan ni Baltazar Tribunalo uban sa mga representante sa Cebu Provincial Health Office (CPHO), Cebu Provincial Social Welfare and Development Office (CPSWDO), Balamban Rural Health Unit ug mga opisyal sa barangay ang mitunol ngadto sa mga beneficiary sa nahisgutang community toilet.
Ang Rise and Build International Foundation, ubos sa initiative ni Latter Day Saints (LDS) ang mitabang sa pagtukod sa mga communal toilet.
Ang Rise and Build International Foundation usa sa mga foundation nga mitabang sa probinsiya sukad pa niadtong bagyong Yolanda diin midonar sila og lain-laing proyekto sa tibuok nasud. (BANAT NEWS)