CEBU, Philippines - Giangkon sa pangu sa Solid Waste Management sa Dakbayan sa Talisay nga ila gyud nga gihunong ang pagkolekta sa basura sa usa ka pribadong tunghaan sa maong siyudad human ilang nadiskubrehan nga dili lang ilang basura ang naa sa ilang eskwelahan.
Matud pa ni Edwin Nierves nga ang maong tunghaan naa nahimutang sa Brgy. Bulacao apan aduna sab kini sangang buhatan sa Siyudad sa Sugbo. Ang maong eskwelahan gipugngan lang una ang pangalan nga gipanag-iya sa dakong opisyal sa Siyudad sa Sugbo.
Asoy pa ni Nierves nga katingalahan ang ilang namatikdan sa basura sa maong tunghaan tungod kay kalit lang kini nga nagkadaghan.
Iyang giasoy nga usa lang gyud ka truck ang ilang mahakot nga basura sa maong tunghaan apan sa miaging buwan halos tulo na ka truck sa basura ang ilang mahakot.
Si Nierves niingon nga tuyo gyud niya nga gipanid-an ang maong tunghaan ug didto iyang nasuta nga aduna'y truck nga iya sa tunghaan nga nagdala og basura ug didto ipamutang ang mga basura sa tunghaan sa Brgy. Bulacao.
Gumikan niini, usa ka semana nila nga wala gihakot ang basura sa maong tunghaan hinungdan nga iyang giprangkahan ang prinsipal sa ilang nabantayan. Wala sab kini gipanghimakak sa prinsipal ang iyang nabantayan. Gani nangayo naman kini og pasaylo dungan sa pasalig nga dili na kini nila buhaton.
Nagkanayon si Nierves nga usa siguro sa rason nga ila kining gibuhat tungod kay naproblema man ang tanang mga Local Government Units (LGUs) kun unsaon nila paghipos ang ilang mga basura karon.
Gisuwayan sa Banat News sa pagkuha og habig ang maong tunghaan apan pakyas kini. (BANAT NEWS)