CEBU, Philippines - Patay nga lawas sa usa ka babaye ang napalgang nag-utaw-utaw sa kadagatan kagahapon sa udto sa may Barangay Calawisan sa Dakbayan sa Lapu-Lapu.
Ang maong babaye naila sa pangalan nga Jewelyn Paculado, hingkod ug taga Barangay Capitol Site, Siyudad sa Sugbo base sa iyang ID.
Matud ni SPO2 Napoleon Taneo ang imbestigador sa Maritime Police nga samtang nagpahigayon og Seaborn Patrol ang mga sakop sa Philippine Navy sa may Lapu-Lapu Gothong Wharf, ilang nakita ang maong babaye nga naglutaw-lutaw.
Uban sa mga sakop sa Maritime Police Scene of the Crime Operatives, ug Philippine Coast Guard napahigayon ang retrieval operation aron makuha ang patay’ng lawas sa maong babaye paingon sa Pier 3 sa Dakbayan sa Sugbo.
Sumala pa ni Taneo, ila pang susihon kun ang nakuha nga ID gikan sa biktima mao ba gyud ang pagkatawo niini. Lakip nilang susihon ang hinungdan sa kamatayon niini ug kun nganong naabot kini sa kadagatan.
Ang patay nga lawas sa babaye gidala sa St. Francis Funeral Homes. (BANAT NEWS)