Hepe sa Catmon gilubong na

CEBU, Philippines - Gilubong na kagahapon sa buntag ang hepe sa Lungsod sa Catmon, Senior Insp. Alexander Nuñez, kinsa gipusil patay sa Lungsod sa Carmen niadtong bisperas sa Pasko.

Pasado alas 9 sa buntag gipahigayon ang misa sa simbahan una gihatud sa Sanctuary Memorial Garden sa Dakbayan sa Danao.

Ang biyuda sa namatay nga si Police Officer 3 Brigitte Nuñez nagkanayon nga hangtud karon wala pa kini nahibawo kung unsaon niya pagsugod ang iyang kinabuhi karon nga wala na ang iyang bana.

Sa pagkakaron usa sa gikuhaan na lang niya og pagpaningkamot ug paglaum mao ang duha ka gagmay nila nga anak.

Bisan pa man og dili na mabalik ang iyang bana apan daku nga garbo alang sa asawa nga namatay ang iyang bana isip usa ka bayani gumikan sa trabaho.

Sayud ang asawa nga daghan pa kaayo nga gustong himoon ang iyang bana alang sa ilang pamilya ug kini nisaad nga iyang himoon ang tanan aron iyang mahatag sa ilang anak ang tanang kinahanglan sama sa pagmahal sa inahan ug pagka-amahan.

Ang inahan sa namatay nga si Anatalia Nuñez, 68, ang emosyonal sab nga nisaysay kung unsa ka buotan ang iyang anak. Matud sa inahan nga bisan og minyo na ang iyang anak wala gihapon sila kalimti ug permanente gyud sila nga bisitahon ug halos dili na lang mobiya sa ilang panimalay.

Panghinaut sa inahan nga unta makuha na nila ang hustisya sa iyang anak ug unta magmalinawon kini sa iyang pagpanaw.

Hangtud karon padayon nga gipangita sa kapolisan ang katapusang suspek sa pagpatay nga si Jaime Jayson nga gituohang ania pa sa Sugbo nagtago-tago samtang aduna nay patong sa ulo nga P150, 000. (BANAT NEWS)