CEBU, Philippines - Nitahan kang Cebu City Vice Mayor Edgar Labella ang guwardiya kinsa suspek sa pagpamusil sa duha ka trabahante sa Silangan II, Tejero.
Niabot sa buhatan ni Labella ang mga sakop sa Homicide Section ug Investigation and Detective Management Branch (IDMB) sa Cebu City Police Office aron pagsikop kang Benvenido Macaraeg.
Nahitabo ang insidente niadtong Disyembre 22 diin gipusil ang mga biktima nga sila si Raul Simbajon ug Gerson Tumulak, trabahante sa Federal Hardware.
Ang mga biktima gidala sa Cebu City Medical Center apan patay na nga nadangat sa tambalanan si Simbajon ug kritikal ang kahimtang ni Tumulak.
Matud ni Superintendent Ryan Devaras, hepe sa IDMB, nga daling nisibat ang suspek ug niuli sa iyang pamilya sa amihanang bahin sa Probinsiya sa Sugbo.
Si Macaraeg niingon nga nakadesisyon siya sa pagtahan tungod ug alang sa iyang pamilya.
Apan giklaro niini nga nabuhat niya ang pagpamusil tungod kay matud pa nag-ungaw sa kaalautan ang iyang kinabuhi kay giingong samtang nag-inom sila, ang mga biktima niagi ug gisita siya.
Aron makalikay sa kasamok nibalhin og pwesto sila si Macaraeg apan sa pag-uli niini agi sa hardware, ang mga biktima giingong nibunot sa ilang armas hinungdan nga nidepensa siya sa iyang kaugalingon.
Matud ni Labella nga gabii sa Domingo lang siya gipahibawo nga kung mahimo sa iya motahan si Macaraeg human usa sa kabanay ang nihangyo alang sa iyang proteksiyon.
Gihulagway sa bise mayor nga mas maayo nga nisurender ang suspek aron atubangon ang sala nga nahimo tungod kay lisud kung magtago-tago ug mabutang na hinoon sa peligro ang kinabuhi.
Kasong murder ug frustrated murder ang atubangon nga kaso sa suspek. (BANAT NEWS)