CEBU, Philippines - Wala kaabti og 24-oras nadakpan sa mga sakop sa Cebu City Police Office ang suspetsadong guwardiya nga mipusil patay ug miangol sa manag-amahang abogado sa dalan F. Ramos sa Brgy. Sta. Cruz, Cebu City sa miaging gabii.
Nadakpan dayon kagahapon sa alas 10:45 sa buntag si Jonathan Sanchez, 35, diha sa balay sa inahan niini sa Sitio Tac-an, Brgy. Talamban ning dakbayan.
Si Sanchez ang suspek pagpusil sa manag-amahang Atty. Goering George Paderanga ug anak niini nga si Atty. Gerik Caesare Paderanga. Ang amahang Paderanga nakabsan gyud sa kinabuhi samtang kritikal pa gihapon ang anak niining si Gerik.
Matud pa, nagmaneho si Gerik sa sakyanan niini diha atubangan sa ilang law office dihang kalit kining giduol sa suspek ug gipusil , dihang migawas ang amahan niini aron pagsusi sa nahitabo gisugat usab kini og bala sa suspek.
Ang dalan nga diin nahitabo ang krimen piot gyud kaayo ug di mahimong masudlan og duha ka sakyanan.
Kagahapon sa buntag ang mga sakop sa Investigation and Detective Management Branch (IDMB) ug mga sakop sa Homicide Section sa Cebu City Police Office ang dungan nga nangita sa suspetsadong guwardiya sa duha ka mga managlahing dapit.
Ang hepe sa IDMB nga Supt. Ryan Devaras nga nahinabi sa Banat News miingon nga aduna silay nakuhang kasayoran nga taga Talamban ang inahan niini maong ilaha dayon kining giadto.
Unang nakuha sa mga polis ang asawa sa suspek nga si Charito ug iyang mga anak nga wala nahibalo sa gibuhat sa iyang bana.
Si Police Officer 3 Winston Ybañez sakop sa Homicide Section sa Cebu City Police Office nga nahinabi sa Banat News ug usa sa mga operatiba nga nakasikop sa suspetsado miingon nga diriyot mabulabog ang ilang operasyon human usa ka dakung iro nga iya sa inahan sa suspetsado ang midasmag sa mga polis.
Sulod sa balay nakita sa mga polis si Sanchez nga naghigda ug kini ilaha dayon nga gisikop. Gitug-an ni Ybañez nga sulay pa unta nga milugnot ang suspetsado pagmata niini apan dali nila kining naposasan.
Ang inahan sa suspetsado ang gikatahong wala usa’y kalibotan sa krimen nga gihimo sa iyang anak.
Sa buhatan sa Police Regional Office-7 nagkita ang asawa. Si Charito, 35, nga nahinabi sa Banat News miingon nga natingala gyud kini sa gihimo sa iyang bana nga wala man unta sila nag-away sa dihang mipaingon kini sa trabaho.
Si Charito mitug-an nga niadtong 2015 makaduha ka higayon nga gidala sa Vicente Sotto Memorial Medical Center ang iyang bana ug pulong pa niya gikan sa mga doktor nakasinati og “mental retardation” ang iyang bana.
“Kaduha na siya namo na-admit sa Sotto…tungod lagi siguro anang problema nga di pud siya mosulti iya lang luom-luomon. Di g’yud na siya mosulti bisan asawa ko di gyud na siya mosulti,” saysay pa ni Charito.
Gitug-an sab sa asawa nga dugay na nga naggamit og drugas ang iyang bana apan karon wala na.
Nagtuo si Charito nga nahitabo kini tungod kay dili gayod mosulti kaniya ang iyang bana sa mga problema niini.
Ang suspetsado nga nahinabi sa mga tigbalita kini miingon nga iyang nahimo ang krimen kay naglagot siya sa mga biktima kay nag-parking kini sa dalan ug dili makasulod ang mixer truck nga nagdala og semento aron magtrabaho sa maong dapit.
“Malangan ang mixer mogahi na man na gud unya iya man giatangan ang dalan mao to (iyang gipusil),” matud pa ni Sanchez.
Sa dihang kini gipangutana kung duna bay nagsugo kaniya hugot kini nga mihimakak.
Ang impormasyon ni Sanchez ang gikompirma sab sa director sa kapulisan sa Police Regional Office-7, Chief Supt. Noli Taliño nga posibling motibo sa kremin.
Si Taliño miingon nga sa nakuha niya nga impormasyon nagkalalis na sab diay kaniadto si Sanchez ug ang mga biktima gumikan gihapon sa pag-parking sa sakyanan sa mga manag-amahan.
Kasong murder ug frustrated murder ang ipasaka sa kapulisan sa suspetsadong guwardiya. (BANAT NEWS)