Nagpaabang sa balay, yuta sa gobiyerno papahawaon

CEBU, Philippines - Papahawaon sa kadagkuan sa Local Housing Board ang mga benepisyaryo kinsa nagpaabang sa yuta ug luna nga ilang nakuha gikan sa kagamhanan sa Dakbayan sa Talisay.

Matud ni Rosalie Autor, kasamtangang pangulo sa Local Housing Board, nga daghan na siya’g nadawat nga taho nga may mga professional squatters ug ang uban nagpaabang gyud sa ilang yuta ug balay nga ilang nakuha gikan sa programa sa siyudad.

Asoy pa ni Autor nga ila nang sugdan ang ilang pakisusi ug kun mapamatud-an nga adunay dili kwalipikado sa maong lugar, ila kining papahawaon ug ihatag ang pwesto ngadto sa mga tawo nga angayan sa maong programa.

Hinuon siya nipasabot nga tagaan sab nila og higayon ang mga tawo nga ilang hukasan sa benepisyo aron sila makapangandam sab.

Sa pagkakaron, adunay nakarehistro nga 18 mil ka tawo apan ang natagaan og luna ug balay mokabat pa lang sa dos mil.

Si Autor kinsa bag-o lang gibutang sa pwesto niangkon nga aduna gyu’y daghang palusot sa niaging nagdumala sa maong buhatan.

Busa siya naningkamot nga dili kini mahimo sa iyang termino isip labaw sa buhatan sa Local Housing Board ug iyang giingon nga dili siya motugot nga aduna gihapoy mga “palakasay system” sa paghatag o pag-award sa yuta ug balay sa mga aplikante. (BANAT NEWS)