CEBU, Philippines - Ang ubang drug surrenderer sa probinsiya nga kinahanglang isulod sa rehabilitation center posibleng ipadala ngadto sa Bohol matud sa hepe sa Cebu Provincial Anti-Drug Abuse Office nga si Carmen Remedios Durano-Meca kun dili gyud magahinan og pundo sa national nga kagamhanan ang Sugbo alang sa katukuran sa rehabilitation center.
Ang probinsiya sa Bohol nalakip sa listahan sa Department of Health (DOH) nga tukuran og rehabilitation center samtang ang kagamhanan sa probinsiya gikatakdang mosuwat sa DOH alang sa ilang hangyo nga unta anhi sa Sugbo itukod ang rehabilitation center.
Si Meca nagkanayon nga niabot na ngadto sa kapin sa 35 mil ang drug surrenderer sa probinsiya ug mga 80-90 porsiyento niini dili mga high risk o wala magkinahanglan nga isulod sa rehab. Samtang ang 10 porsiyento niini nga nagkinahanglang isulod sa rehab posibleng mapadala ngadto sa Bohol kun dili ma-reconsider ang ilang hangyo.
Apan kun ang rehab center sa lungsod sa Argao nga gidumala sa DOH madugangan og laing building maka-accommodate kini og dugang pang mga drug dependent.
Hinuon matud ni Meca nga base sa ilang nasabutan ang probinsiya mosentro sa community based treatment program alang sa mga low-risk nga drug surrenderer.
Ang mga barangay maoy mopahigayon niini diin usa sa ilang buhaton mao ang paghatag og counseling. (BANAT NEWS)