Cardinal Vidal mapasalamaton sa 45 ka tuig isip Obispo

CEBU, Philippines - Si Cebu Archbishop Emeritus Ricardo Cardinal Vidal nisaulog sa iyang ika-45 ka tuig isip obispo kagahapon ug nipadayag nga padayon gihapon siyang nakigbugno sa kamingaw human sa iyang retirement.

Matud pa ni Vidal, mapasalamaton siya sa Ginoo sa gasa sa bokasyon diin 60 ka tuig na siyang pari ug 45 ka tuig sa ministry isip bishop.

Sumala pa sa Cardinal, nagtuo siya nga human siya niretero, wala na usab siya’y bug-at nga pas-onon ug lisod nga sitwasyon apan iyang nasuta nga ang labing sakit nga bahin sa iyang kinabuhi mao ang kamingaw ug kalaay, diin kun sa una limitado ang iyang bisita tungod sa kadaghan nga nagpaabot, karon siya na ang mangimbitar og tawo nga siya bisitahon.

"Please dont get me wrong, in my anniversary today, I don't want you to listen to what seem to be frustration and regrets of an old man," matud pa ni Vidal.

Dugang niini nga daku iyang kalipay nga iyang nakita ang mga tawo nga nitambong sa iyang kalihukan ug nagpahinumdum kini kaniya nga ang gasa sa pagka obispo dili lamang alang sa iyang kaugalingon kun dili alang sab sa simbahan ug sa katawhan sa Dios.

Gibutyag ni Vidal nga makita ang Ginoo sa panahon nga ikaw makabatyag og kakuwang kay matud pa “God is the Supreme Good and you will have to empty yourself of any lesser  good because your heart might find contentment in such lesser goods and those lose any desire for the greatest good.”

Awhag ni Vidal sa katawhan sa iyang anibersaryo nga ipadayon ang gugma ngadto sa Ginoo ug dili sa bisan unsa lang. (BANAT NEWS)