Management team ni Tommy gibanhaw

CEBU, Philippines - Nagsugod na ang kagamhanan sa Dakbayan sa Sugbo sa pagpanguha og mga motrabaho isip mga sakop sa Mayor’s Management Team (MMT).

Ang MMT usa ka programa nga gisugdan ni Mayor Tomas Osmeña sa nakalabay nga 20 na ka tuig diin gilangkuban kini sa mga hinashasan nga mga tawo nga gradwado nga cum laude, magna cum laude ug summa cum laude.

Sa official Facebook page sa mayor iyang gipahibawo nga andam na sila modawat og mga aplikante alang sa MMT nga makatabang aron mas paspas ang paghatag og serbisyo sa kagamhanan sa siyudad sa katawhan.

Sigun ni Osmeña nga giila sa Ateneo de Manila University Graduate Business School ang Siyudad sa Sugbo nga usa sa “Ten Best Models of Management” sa tibuok Pilipinas nga usa ka dakung garbo.

Panahon sa administrasyon ni kanhi mayor Michael Rama giwagtang ang MMT.

Mismo si Osmeña ang mo-train sa mga sakop sa MMT ug nasuta nga sa nilabay nga MMT sa mayor niabot og 80 ang sakop niini nga iyang gihulagway nga pulos nagmalampuson sa tagsa-tagsa nila ka karera.

Ang training molungtad og lima ka adlaw ug isunod dayon ang mga nagkalain-laing exercises nga makatabang nila aron mas mapalambo pa ang ilang katakos.

Giklaro usab niini nga wala siyay target date alang sa maong plano sanglit ang iyang gusto nga sa hinay-hinay dunay maayong resulta ang pagtrabaho niini. Nasuta nga dunay 15 nga kanhi sakop sa MMT ang nitabang sa mayor sa iyang subling pagbanhaw og balik sa grupo.

Sa mga gustong mo-apply moadto lang sa Human Resource Department sa Cebu City Hall diin sugdan ang screening sa mga applications ug ang mga makapasar sa interview magsugod sa training sa buwan sa Pebrero sunod tuig ug kadtong mapili nga dunay labing maayong performances ang mahimong sakop sa MMT. (BANAT NEWS)