CEBU, Philippines - Usa ka piniriso sa Cebu Provincial Detention and Rehabilitation Center (CPDRC) ang nakaeskapo sa Vicente Sotto Memorial Medical Center human kini na-admit sa maong tambalanan.
Ang maong priso nga giilang si Efren Larriosa nga taga Minglanilla gikatahong nieskapo niadtong Sabado pinaagi sa pagputol sa iyang ankle chain diha sud sa banyo.
Si Jason Monteclar, tigpamaba sa Kapitolyo mibutyag nga nasayod na niini si Gob. Hilario Davide III.
Si Larriosa matud pa nakombikto sa kasong robbery ug gisilotang mabilanggo og duha ka tuig ug nakaserbisyo na niini og usa ka tuig ug walo ka bulan, upat na lang unta ka buwan makagawas na kini.
Matud pa adunay duha ka gwardiya nga gipabantay kaniya ug uwahi nilang nakita si Larriosa alas 3 sa kaadlawon niadtong Sabado, apan nianang pagkaalas 4 sa kaadlawon giingong nisud sa banyo si Larriosa.
Alas-5 sa kaadlawon nakit-an kini sa nurse nga naghigda dayon usahay naglingkod, apan pagka-alas 6 sa buntag wala na kini. Pagpuli sa ikatulo nga gwardiya gikatahong alas 7:09 sa buntag wala ipahibalo sa mo-off duty nga na-missing si Larriosa apan niana nang pagka alas 9:30 nila gipahibalo nga nakaeskapo na gyud ang maong priso.
Nasayran usab nga nianang Biyernes sa gabii, giduaw si Larriosa sa iyang uyab ug gidudahan ni Dr. Gil Macato, ang acting jailwarden sa CPDRC, mao kini ang nagdala og huramintas nga pangputol sa leg chain ni Larriosa.
Matud pa nga didto sa banyo gihimo ang pagputol nga gitabonan lang ang tingog pinaagi sa pagpaagas sa tubig sa gripo ug giingong nagsapaw kini og yellow nga t-shirt.
Gisubay na sa mga otoridad ang balay sa ginikanan niini sa Maghaway ug sa mga balay sa igsuon niini apan wala kini didto. (BANAT NEWS)