3 Sugbuanon sa top 10 sa LET
CEBU, Philippines - Tulo ka graduates sa mga unibersidad sa Siyudad sa Sugbo ang nakasulod sa top 10 highest spots sa Licensure Examination for Teachers.
Sila apil sa 31,334 secondary teachers nga nakapasar gawas sa 92,754 nga nikuha sa exams niadtong Septiyembre.
Si Ian Christian Cosido, 20, ang nakakuha sa labing taas nga ranking nga nakatungtong sa 4th place nga may 89.20 percent nga rating.
Uban ni Cosido nga graduate sab sa Cebu Normal University si Flordeliz-Joy Pansag sa 9th place sa rating nga 88.20 percent.
Usa ka gradwar sa University of San Carlos nga si Jayvee Armamento, 21, nitungtong sa 8th place sa rating nga 88.40 percent.
Si Cosido taga Sevilla, Bohol apan nibalhin na ang iyang pamilya sa Dakbayan sa Mandaue.
Para niya, ang kakugi ug dili ang ka-bright ang nakahimo niyang malampuson ug sa dakung tabang sa Ginoo.
Si Armamento nagdaku sa Barangay Looc, Mandaue City.
Wala niya gikauwaw nga nakalampus siya gikan sa kakugi usab sa pagpanarbaho sa mga ginikanan niini kinsa ang amahan usa ka taxi driver ug ang inahan usa ka factory worker.
Si Armamento nigradwar sa USC niadtong Abril 2016 isip magna cum laude sa kursong Bachelor of Secondary Education major in Physics – Mathematics ug isip usa ka DOST scholar.
Iya usab gidungan ang pagtungha ug pagtrabaho og ginagmay pinaagi sa pag-tutor.
Siya nagtrabaho na isip Senior High School teacher sa Colegio de la Inmaculada Concepcion sa Mandaue City. Plano usab niya nga mokuha og master’s degree.
Gusto niyang haw-ason iyang pamilya gikan sa kapobre pinaagi sa pagtabang sa mga manghud niini nga makalampus sa pag-eskwela ug pagpaundang sa mga ginikanan niini sa pagtrabaho. (BANAT NEWS)
- Latest
