CEBU, Philippines - Patay ang usa ka gidudahang nalambigit sa ilegal nga drugas nga gipusil sa duha ka lalaking nagtaptap og panapton sa ilang mga nawong diha sa Sitio Lumbang, Brgy. Pulpogan, Lungsod sa Consolacion.
Si Police Officer 1 Raymond Lleve sa Consolacion Police Station miila sa biktima nga mao si Rolando Blanco, 41, taga Sitio Catugasan, Brgy. Casili sa nahisgotang lungsod.
Matud pa ni PO1 Lleve nga naglingkod lang ang biktima kauban sa iyang higala dihang nahidangat ang duha ka mga wala hiilhing lalaki nga nagsakay og motorsiklo.
Ang backrider kalit miibot og armas dayon gipusil ang biktima sa makadaghang higayon ug daling mipabulhot palayo sa dapit.
Ang biktima gidala sa iyang mga kabanay ngadto sa Eversely Child Sanitarium Hospital sa Dakbayan sa Mandaue apan gideklarar kini sa mga doktor nga dead on arrival.
Si PO1 Lleve miingon nga ang namatay nalakip kini sa ilang gihimong Oplan Tukhang sa maong lugar sa miaging bulan apan wala kini motahan ngadto sa ilang buhatan. (BANAT NEWS)