Kanlaob River kontaminado og E. coli bacteria

CEBU, Philippines - Gikompirmar sa Provincial Health Office nga kontaminado sa bakterya nga “E.coli” ang Kanlaob River nga anaa mahimutang sa Lungsod sa Badian ug Alegria kun asa ipahigayon ang canyoneering activity.

Ang PHO nipahigayon og testing sa tubig sa sapa sa Kanlaob human sila gipahibalo sa Provincial Tourism Office.

"Mao lage na taas kaayo og “E.coli”, the whole stretch of the water source gikan taas padulong ubos.  Amo na na-confirm through sa among independent study sa among office nga taas gyud kaayo", matud ni Dr. Rene Catan ang hepe sa PHO.

Si Boboi Costas ang pangulo sa Provincial Tourism Office nagkanayon nga 19 ka water samples ang ilang gikuha gikan sa nagkadaiyang dapit sa Kanlaob river. Siya niangkon nga wala nila kini gibutyag sa publiko paglikay nga mag-panic ang mga tawo. 

Silang Costas ug Catan parehong nagtuo nga usa sa hinungdan nganong taas og bakterya ang maong tubig tungod sa hugaw sa mga hayop ug tawo.

"Eventually inig ulan mo-run off gyud na didto sa river, so that's one of the factor kung nganong taas kaayo og E.coli kanang river", dugang pa ni Catan.

Nasayran usab sa PHO nga pipila sa kabalayan nga duol sa Kanlaob river, walay pansayan nga usa sa ilang gituohan hinungdan nganong kontaminado ang tubig.  Si Catan nagkanayon nga nakig-alayon na sila sa lokal nga pangagamhanan sa Badian ug Alegria kabahin niini hilabina nga sakop sa duha ka lungsod ang maong  sapa.

Gisugyot sa PHO nga magbutang og signage ang mga LGUs nga nagpahibalo nga dili angay imnon ang tubig sa sapa kay hugaw.

"Ang solution nato ani kay short term naghatag ta og warning,  second option for long term kay tan-awon nato tong mga mananap nga ipalayo sila sa river source mag butang ta og balaod nga dili gyud na sila pwede motugway nga 50 meter close to the river" asoy pa ni Catan.

Ang “E.coli” usa ka matang sa bakterya gikan sa hugaw sa mga hayop ug tawo. Ang tubig nga makontaminado niini, posibleng hinungdan sa sakit sama sa diarrhea, typhoid fever ug cholera. (BANAT NEWS)