Nagpakatakos mi pagpasiugda sa ika-19 nga Grand Halad sa Kapamilya gahapon, Sabado, sa Main Campus sa Cebu Technological University (CTU) isip higanteng pamilya sa mga institusyon, kahugpongan, kompaniya ug indibiduwal nga nagkauyon sa pagtubag sa dinaliang panginahanglan sa pagtabang sa labing nagkinahanglan sa mga molupyo sa Sugbo ug kasilinganan nga mga lalawigan.
Nalipay mi nga hinabolan sa maayong kahimtang sa panahon human sa pagpanghasi sa bagyong Marce sa amihanang Sugbo ug ubang bahin sa Kabisay-an ug Mindanao, kasagaran sa mga nakapahimus sa labing dakong piyesta sa libreng mga pangalagad nangabot isip pamilya, nagbitbit sa ilang mga masuso ug kabataan, ug nag-agak sa ilang mga ginikanan, mga apohan ug katiguwangan.
* * *
Dul-an sa 20 mil ang among naihap nga nakapahimus sa nagkalainlaing mga pangalagad sugod sa alas-6 sa buntag hangtod nga nanghipos mi gahapon sa hapon. Pipila nila naglinya na sa mga ganghaan sa CTU sa ala-una pa sa kadlawon. Kasagaran naggikan sa labing kabos nga mga barangay sa palibot. Apan may pipila nga naggikan sa labing lagyo nga mga lungsod ug mga dakbayan sa habagatan ug amihanang Sugbo ug kasilinganang mga lalawigan sa Central Visayas.
Nagkalainlain ang ilang pangedaron. Ang labing linghod gikugos sa ilang mga ginikanan ug mga maguwang. Ang labing hamtong giagak sa ilang mga anak ug mga apo, ang uban nagsungkod apan nilahutay sa paglibot sa tibuok venue.
* * *
Ang labing sayo nga mga doktor, sila si Dr. Edisa Ermac sa Consolacion ug Dr. Danny Dionson sa Mandaue City, nag-una pa sa nurses, nga mao untay gitahasan sa pre-consultation, sa pag-atiman sa labing sayo nga mga pasyente.
Mas daghang doktor gikan sa nagkalainlaing mga tambalanan ang nanambong ug mas daghang tambal ug antipara ang among natigom gikan sa manggihatagon nga mga indibiduwal ug mga institusyon. Mas daghan sab nga pagkaon, kinaadman ug ubang gasa ang nagbaha alang sa labing masakiton, labing gipanggutom ug labing giuhaw sa nag-abot nga mga kapamilya.
* * *
Katam-is sa sayong pinaskohan nga gisaw-an sa tanang nanambong sa Grand Halad sa Kapamilya gahapon: Ang kaamguhan nga usa ta ka pamilya, nga bisan sa daghan ug dagko nga pagsuway karong tuiga, nakasugakod ta tungod sa pagpili sa pagtinabangay.
Kamadasigon sa atong pagsugat sa umaabot nga bag-ong tuig: Bisan sa higanteng kalibogan nga atong atubangon, sa atong personal nga mga kinabuhi ug isip nagpakabana nga katawhan ubos sa usa ka bandila, makapili ta sa pagbuntog sa tanang kakulian. Pinaagi sa pagpili sa panaghiusa, inay sa pagkatibuwaag. Pinaagi sa pagsinabtanay sa nagkalainlain natong panglantaw ug panginahanglan inay sa pagtulisokay. Pinaagi sa pagkuptanay inay sa pag-iyahay. Sa pagpatigbabaw sa mga mithi nga makapahiusa nato. Inay sa pag-unay.