CEBU, Philippines - Gihangyo sa pangulo sa City Disaster Risk Reduction and Management Office (CDRRMO) sa Dakbayan sa Talisay ang tanang mga motorista nga mag-agian sa dalan padung saka sa Brgy. Manipis nga dili na lang mopugos tungod kay delikado gihapon ang lugar nga modahili ang yuta matag karon ug unya.
Si Alvin Santillana niingon nga dili man matagna ang yuta kun kanus-a kini modahili ilabi na nga humok ang mga yuta karon tungod sa pagsige og uwan ug ning bag-o mao ang pag-agi sa bagyong si Marce.
Ang lugar sa Campo 4 ug Manipis ang pinakauwahing insidente diin nidahili ang yuta padung sa gitrabahong dalan sa Department of Public Works and Highways (DPWH).
Nagkanayon si Santillana nga nagpadayun gihapon ang clearing operation sa kontraktor diha sa nahisgutang lugar.
Nihangyo siya sa tanan nga kung moadto sa Dakbayan sa Toledo adto na lang gyud moagi sa Uling Road sa Naga City ug kadtong padung sa bukirang bahin sa Sugbo adto na lang manukad sa Brgy. Sudlon. (BANAT NEWS)