CEBU, Philippines - Gamay lang ang kadaut nga natala sa Provincial Disaster Risk Reduction and Management Office (PDRRMO) sa mga lungsod nga gikuso- kuso sa bagyong Marce partikular na sa amihanang bahin sa Sugbo.
Matud ni Julius Regner ang tigpamaba sa PDRRMO nga pipila ka mga kahoy ang nangatumba tungod sa bagyo ug mga pananom nga nadaot sama sa saging ug tubo.
Didto sa Dakbayan sa Toledo adunay landslide nga nahitabo sa barangay Capt. Claudio diin usa ka balay ang natabunan apan nakabakwit na ang pamilya.
Nawad-an usab og kuryente ang mga lungsod sa amihanang bahin sa lalawigan, sama sa Tabogon, Medellin, San Remigio ug Sogod alas 11 niadtong petsa 24, apan nabalik ra usab ang kuryente didto sa Daanbantayan ug Dakbayan sa Bogo kagahapon sa buntag.
Upat usab ka mga balay ang partially damaged samtang usa ka gamay nga tindahan ang naguba human natumbahan sa kahoy didto sa Medellin.
Matud ni Regner usa usab ka passenger Marine Super Shuttle Ferry ang nasangad didto sa marine sanctuary sa Hilantagaan Island sa Sta. Fe pasado alas 2 sa kaadlawon kagahapon tungod kay hunas apan nakuha ra usab kini ug gisusi pa kun adunay nadaot sa marine sanctuary.
Si Regner nagkanayon wala’y nakalas nga kinabuhi sa pangusokuso sa bagyong Marce samtang padayon ang clearing operations sa mga lungsod nga naapektohan sa bagyo.
Apan didto sa Malapascua, usa ka dive master Kenneth Duarte didto ang ni-post sa iyang Facebook Account og mga hulagway sa mga pumpboats nga gamiton sa mga turista sa scuba diving, mga pasaheroan nga pumpboats ang nangaguba.
Samtang gitugotan na pagbalik nga makabiyahe kagahapon sa alas kuwatro sa hapon ang tanang barko human gilibkas sa PAGASA ang Storm Warning Signal No. 1 sa Sugbo ug Central Visayas.
Si Ensign Melton Ngalew, Deputy Commander Coast Guard Stations Cebu nga nahinabi sa Banat News miingon nga alas-4 sa hapon hingpit nang gitugot ang pagbiyahe sa ilang mga substations nga naglangkob sa Cebu City Port, Bato, Danao, Toledo, Hagnaya, Argao, Tabuelan, Mandaue, Tinago, Bantayan, Camotes, Naga, ug Tangil.
Sumala pa ni Ngalew, wala na usab sila’y stranded nga pasahero bisan og nag- kanselar og biyahe ang Super Shuttle Ferry 26 padulong Santa Fe tungod kay taas pa ang balod apan gikarga na ang mga pasahero sa laing barko.
Dugang pa ni Ngalew, mahimo na makapanagat ang mga mananagat apan likayan lang una ang amihanang bahin sa Sugbo tungod sa kadagko pa sa balod. Le Phyllis Antojado ug Rowena D. Capistrano (BANAT NEWS)