Pamahayag nilang Espinosa ug Dayan nagsumpaki

CEBU, Philippines - Nitestimoniya sa gihimong house inquiry ang kanhi drayber ug bodyguard ni Senadora Leila De Lima nga si Ronnie Dayan kagahapon diin iyang giangkon nga nakadawat siya og kwarta gikan sa nailang drug lord nga si Kerwin Espinosa niadtong tuig 2014.

Sa report sa philstar.com, si Dayan kinsa nihangyo og legislative immunity niingon nga nikuha siya og kwarta gikan kang Espinosa lima ka higayon alang sa iyang amo nga si kanhi Justice Secretary De Lima.

Iyang gibutyag nga ang labing una nilang panagkita ni Espinosa nahitabo niadtong Agosto sa tuig 2014 ug nasundan pagka Oktubre ug katulo pag Nobiyembre.

Nagtuo siya nga si Espinosa usa ka engineer ug wala siya masayod nga nagdawatan diay siya og kwarta gikan sa usa ka drug lord.

Kahinumduman nga sa gihimong Senate inquiry niadtong Miyerkules, nitug-an si Espinosa nga sa kinatibuk-an nakahatag siya og P8 milyones ngadto kang De Lima pinaagi ni Dayan bugti nga siya protektahan. Ang maong kwarta giingong maoy gigasto sa kampanya sa kanhi Justice Secretary.

Matud ni Espinosa nga nakadawat siya og tawag gikan sa wala niya mailhi nga staff ni De Lima kinsa uwahi na niyang nailhan nga si Dayan diay nga maoy tigpangayo og kwarta.

Gibutyag ni Espinosa nga niadtong Agosto sa niaging tuig maoy una nilang panagkita ni Dayan sa parking lot sa MOA. Nasundan kini niadtong Oktubre 2015 sa restaurant sa Macapagal Avenue sa Pasay City diin nihatag na sab siya og P1.7 million.

Dugang ni Espinosa nga katulo ra sila nagkakita ni Dayan ug ang katapusan niini mao sa Burnham Park sa Baguio City.

Ang maong mga pamahayag ni Kerwin sukwahi sa gipanulti ni Dayan.

Gibutyag ni Espinosa nga nakumpleto niya’g hatag ang P8 million nga protection money, Pebrero niining tuiga human niya mahatag ang kuwang nga P2.3 million ngadto kang Dayan sa parking lot sa MOA. Gumikan niini nabantayan ni Senador Panfilo Lacson ang nagsumpaki nga mga pamahayag sa duha.

Una nang gitug-an ni Dayan atol sa press conference niadtong Martes nga una silang nagkita ni Espinosa niadtong 2014 ug gipalig-on niya ang maong pamahayag sa iyang affidavit.

“We saw Dayan make his statement last night even without the hearing kay Espinosa na sinasabi naman talaga nya na kinukumpirma [they met] on several occasions, 'yun lang year ang nagkakaiba: kay Dayan 2014, itong kay Espinosa, 2015,” Matud ni Lacson human sa senate hearing niadtong Miyerkules. “Iyon ang sinasabi kong may pagkakaiba.”

Nagduda na si Lacson sa ubang statements ni Espinosa dungan sa pag-ingon nga kinahanglan kining beripikahon.

Human sa house inquiry, gitugyan sa ubos balay balauranan si Dayan ngadto sa PNP. (BANAT NEWS)