CEBU, Philippines - Bagyong Marce gipaabot nga moigo sa Visayas ilabi na dinhi sa Sugbo karong hapon adlaw nga Biyernes human kini niigo sa Hinatuan Surigao del Sur, kagahapon sa hapon.
Si Pag-asa -Visayas Director Oscar Tabada nga nahinabi sa Banat News miingon na nitugpa na sa kayutaan sa Hinatuan ang bagyong Marce kagahapon ug karong buntag maabot na kini sa Getape, Bohol ug karon hapon sa Sugbo nila gipaabot moigo ang bagyo.
Sa 4:00 pm weather bulletin kagahapon ang bagyong Marce adunay dalang kinakusgang hangin nga 45 kph duol sa tunga ug haguros nga 55 kph. Nag-irog kini padung sa amihanang-kasadpan sa gipaspason nga 19 kph.
Sumala pa ni Tabada, masinati gayud karong adlawa ang kusog nga ulan sa Sugbo hinungdan giawhag ang tanan nga magmabinantayon ug dili mokompiyansa ug kanunay magpaminaw sa taho gikan sa ilang mga local disaster may kalabutan sa lakaw sa panahon.
Dugang pa ni Tabada, masinati gihapon ang pag-ulan-ulan sa Visayas adlaw nga Sabado ug sa Domingo gipaabot nga maayo na ang lakaw sa panahon kay pagka-Lunes mogawas na kini sa Philippine area of responsibility.
Si Tabada, nipadayag human sa bagyong Marce wala pa silay laing na-monitor nga nagdanga-danga nga bagyo.
Na-stranded
Dul-an usa ka libo ka pasahero ang nangatanggong sa mga pantalan human walay mga barko, cargoes, motorbanca nga gitugotan nga makalawig kagahapon tungod sa bagyo.
Si Ensign Melton Ngalew, Deputy Commander Coast Guard Station Cebu nga gikahinabi sa Banat News mitug-an nga niadtong Miyerkules pa sa gabii gisaka na nila ang heightened alert status human napaubos sa Storm Warning Signal ang Sugbo.
Sumala pa ni Ngalew, gikan alas-8 kagahapon sa buntag hangtod alas tres sa hapon 975 ka mga pasahero ang na-stranded gikan sa mga pantalan sa Bantayan, Camotes, Naga, Tangil, Aduana, Bato, Danao, Toledo, Hagnaya, Argao, Tabuelan, Mandaue, ug Tinago.
Samtang dunay 81 cargo vessels, 42 ro-ro vessels ug 10 ka motorbanca ang wala gitugotan nga molawig.
Giawhag ni Ngalew, ang mga na-stranded sa pagsabot lang sa panahon tungod kay ang ilang gitan-aw ug giseguro mao ang ilang kaluwasan ug sa mga mangingisda nga dili lang usa managat hangtod dili molurang ang bagyo.
Ang tanan substations sa coast guard nakig-alayon na sa ilang mga LGUs ug local disaster ilabi na may kalambigitan sa bagyo.
Nangandam na usab ang kapulisan sa Police Regional Office-7 sa bagyong Marce sumala pa ni PRO-7 director Chief Supt. Noli Taliño.
Si Taliño miingon nga nitambong na sila og panagtigom sa Office of the Civil Defense (OCD)-7 alang sa pagpangandam sa umaabot nga bagyo.
Kung dunay mopatuman og force evacuation ang mga opisyal sa mga dapit nga segurong maapektohan sa bagyo andam sila mohakot sa mga tawo ngadto sa mas luwas nga dapit. (BANAT NEWS)