CEBU, Philippines - Nameligro ang Cebu South Reclamation Project nga kuhaon sa nasudnong kagamhanan tungod sa mga kalapasan sa balaud nga nahimo sa pagbaligya sa mga luna niini ngadto sa mga dagkung korporasyon.
Kini ang gipadayag ni kanhi gobernador ug kongresista Pablo Garcia nunot sa giingong ilegal nga pagbaligya sa mga luna ngadto sa SM Prime Holdings, Filinvest Land, Inc., Ayala Land ug Cebu Holdings.
Matud ni Garcia nga walay pagtugot sa Kongreso ang pagbaligya sa luna nga kalapasan sa Commonwealth Act No. 141 o ang Public Land Act nga maoy gibasehan sa paghatag sa Special Patent ug pito ka Transfer Certificates of Title ngadto sa Siyudad sa Sugbo.
Gitumbok sab ni Garcia ang nalatid sa Konstitusyon nga nagdili sa mga pribadong korporasyon nga makapalit sa maong matang sa luna nga giila nga “alienable lands of the public domain.”
Ang balaud gibarugan sa Korte Suprema sa landmark case sa Francisco I. Chavez vs. Public Estates Authority, et. al, G.R. No. 133250, July 9, 2002.
Matud ni Garcia nga kinahanglan nga ang kagamhanan sa Siyudad sa Sugbo mohimo na og legal nga lakang samtang dili pa uwahi ang tanan.
Usa sa mga sugyot ni Garcia mao ang pagpasar og balaudnon sa Kongreso nga magtugot sa Siyudad sa Sugbo sa pagbaligya sa luna sa SRP. (BANAT NEWS)