Samsam wa kauyon sa ihulip nga fire marshall
CEBU, Philippines - Giklaro ni Kongresista Gerald Anthony “Samsam” Gullas nga dili siya supak kung hulipan si Talisay City Fire Marshal, Chief Insp. Randy Mendaros.
Apan iyang gikasupakan mao ang giingong ang ihulip ni Mendaros giingong dili maayo ang performance sa Tagbilaran City, Bohol.
Sa niaging semana si Mendaros nakadawat og report nga siya hulipan na ni Senior Insp. Raul Bustalino gikan sa Tagbilaran City.
Apan nagkanayon si Gullas nga nakadawat siya og report nga dili maayo ang performance ni Bustalino.
“Hapit na lang gani na gideklarar og persona non-grata didto sa council sa Tagbilaran. Unya mao nay ipuli diri sa Talisay,” asoy pa ni Gullas.
Iyang gihulagway nga maayo ang performance ni Mendaros sa pagdumala sa kabomberuhan sa Dakbayan sa Talisay ug gani daghan pa unta sila og plano aron sa pagpalambo pa sa ilang serbisyo.
Matud ni Gullas nga dili siya makatugot nga himuon lang nga labayanan ang Talisay sa mga badlungon.
Samtang si Mendaros sa iyang bahin nitataw nga andam ra gyud siya motuman kun unsa man ang mando sa iyang mga labaw. (BANAT NEWS)
- Latest
