Problema sa mga benepisyaryo sa SIR sulbaron

CEBU, Philippines - Hatagan ni Mayor Tomas Osmeña og higayon ang dul-an sa 4 mil ka pamilya nga benepisyaryo sa Slum Improvement and Resettlement (SIR) program nga makabayad sa ilang obligasyon bisan og nilapas na ang termino sa pagbayad.

Matud sa mayor nga tigumon nila ang mga hingtungdang benepisyaryo aron pahibaw-on sila kun pila ang kantidad nga ilang bayran kada buwan ug direkta na ngadto sa City Treasurer’s Office.

Gitataw sa mayor nga ang kantidad nga bayran sa mga benepisyaryo dili kaayo bug-at aron nga dili sila maglisod sa pagbayad kada buwan. Ang maong mga pamilya, sagad nagpuyo kaniadto sa tubigan pa nga bahin sa Sitio Alaska, Brgy. Mambaling ug kanait nga dapit nga sakop sa Brgy. Duljo-Fatima, gihatagan og higayon nga makaangkon og luna nga giandam sa nasudnong kagamhanan ubos sa SIR project.

Base sa kasabotan nga gipirmahan atol sa termino ni kanhi mayor Florentino Solon nga ang luna nga giukopahan sa mga benepisaryo bayaran nila sa anam-anam nga paagi sulod sa 25 ka tuig, apan napupos na lang ang termino nga gitagal, daghan ang wala makabayad.

Ang konseho sa dakbayan, nigama og ordinansa nga naghatag og 10 ka tuig nga lugway aron mabayran nila ang ilang obligasyon, apan wala dayon kini ikapatuman kay wala kahimoi og Implementing Rules and Regulations.

Si Alvin Dizon, consultant ni Osmeña alang sa kalihukan sa urban poor, nibutyag nga kadaghanan sa mga benepisyaryo wala makabayad sa ilang obligasyon. Iyang gitataw nga sama sa problema sa mga namuyo sa 93-1 lots, tinguha sa administrasyong Osmeña nga masulbad usab ang SIR project.

Matud ni Osmeña nga may isyu pa nga angay’ng resolbahon kay adunay mga public places, sama sa karsada ug ubang public places sa SIR nga gitukoran og panimalay. (BANAT NEWS)