CEBU, Philippines - Niabot sa 291 ka tawo ang nitahan sa kapolisan sa Isla sa Comotes sa gihimong Oplan Tukhang niadtong nakalabay nga adlaw.
Ang director sa Cebu Provincial Police Office, Senior Supt. Eric Noble, niingon nga gikalipay sa director sa Police Regional Office-7, Chief Supt. Noli Taliño, ang maong taho.
Matud ni Noble nga kaniadto sa wala pa girelibuhan ang mga polis sa maong dapit, gamay ra ang ni-surrender apan karon mas agresibo ang mga bag-ong nadestino nga polis ug daghan na ang nitahan.
Si Noble niingon nga posibleng nakatabang ang ilang “Balik Eskwela” sa mga polis sa maong dapit ug giilisan sa mga bag-o gikan sa Regional Public Safety Batallion-7.
Alang ni Noble nga ang mga tawo nga nitahan nagpasabot lang kini nga gusto na nila nga magbag-o ug dunay pagsalig sa mga polis.
Nanawagan sab kini sa uban nga wala pa nitahan nga mopakita na sa buhatan sa kapolisan kung asa sila nagpuyo ug dili na paaboton pa nga ang mga polis nga maoy moduol kanila o kaha sila madakpan sa mga anti-drug operation.
Samtang nisuroy na sab ang kapolisan sa Dakbayan sa Talisay sa mga panimaye nga ilang naila nga namaligya ug mogamit og ilegal nga drugas.
Ang mga panimaye mao kadtong wala pa natukhang sa Barangay Tabunok.
Kuyog sa mga barangay tanod, si Senior Insp. Edward Villarin nga nangulo sa pagsuroy, nagkanayon nga ilang hutdon ang 22 ka barangay sa dakbayan aron ila na sab hangyuon pagbalik ang mga tawo nga nalambigit sa ilegal nga drugas nga moundang na sa ilang kalihukan.
Atol sa pagtukhang sa Barangay Tabunok, pulos asawa ug mga ginikanan ang niatubang sa kapolisan ug wala ang mga tawo nga ilang gipangita.
Hinuon ang pamilya sa ilang target mao na lang ang ilang giestoryahan nga paundangon na gyud sa ilegal nga negosyo ang ilang kaliwat. (BANAT NEWS)