Taga Cebu City ra makaapil sa bidding
Kini ang usa sa kausaban nga ipatuman sa BAC human giuktaba karong Biyernes ang bidding nga wala nadayon niadtong Lunes.
Una niini ang BAC nimando nga ang makaapil sa bidding mao kadtong mga suppliers nga makaseguro nga may mga piyesa ang mga ekipo bisan asa nga dapit sa Pilipinas.
Apan sa kausaban nga gihimo, kadto na lang may opisina ug ayuhanan sa Dakbayan sa Sugbo ang makaapil.
Adunay lima ka suppliers ang gikatakda nga moapil sa bidding.
Kini mao ang ConEquip Philippines nga nakig-hiusa sa RDAK Transport Equipment, Inc.; TKC Heavy Industries, Civic Merchandising, Socor Construction Corp., D’Limitless Vehicle Corp. ug JVF Commercial.
Ang ConEquip/RDAK, TKC ug Socor lang ang may buhatan sa Dakbayan sa Sugbo samtang ang Civic ug D’Limitless nahimutang sa Dakbayan sa Mandaue ug ang JVF nakabase sa Quezon City ug Davao City apan adunay accredited service shop sa Dakbayan sa Mandaue.
Una na nga gitangtang sa BAC ang G7 standard requirement human kini gikalibog sa ubang suppliers dihang ang komitiba niinsister nga ila gihapon dawaton ang produkto sa China.
Ang Group of Seven (G7) gilangkuban sa mga dagkung nasud sa Canada, France, Germany, Great Britain, Italy, Japan, ug United States.
Ang isyu nakapatumaw sa pagduda nga ang bidding pabor gihapon sa ConEquip nga kasagaran gikan sa China ang ilang ekipo.
Ang ConEquip mao unta ang gipadaug sa unang bidding bisan maoy labing mahal nga niabot sa P250 milyones hinungdan nga si Gobernador Hilario Davide III nideklarar og "failure of bidding" aron mapapas ang mga pagduda nga gipaburot ang presyo niini.
Ang RDAK nga adunay labing ubos nga presyo nga P235 milyones sa niaging bidding ang nakighiusa na karon sa ConEquip. (BANAT NEWS)
- Latest
