CEBU, Philippines - Duha patay sa managlahing insidente sa pagpamusil niaging Huwebes ug Biyernes, usa sa biktima giingong wala maka-remit sa halin sa drugas.
Patay ang usa ka construction helper nga gipusil sa duha ka wa mailhing tawo nga nagsakay og itom nga motorsiklo.
Ang biktima nga si Julian Ramos alias "Weweng" 42, nagduwa lang og chess dihang gihunongan kini sa motor ug ang backrider mition og armas apan giingong natagak kini sa dalan. Tungod niini, nakabantay ang biktima ug midagan apan gigukod gihapon siya niini ug gipusil hangtud nga naigo kini sa tiil nga nakaingon sa pagkalukapa niini ug diha na kini gitiwasan.
Atol sa imbestigasyon sa Crime Scene Investigation Unit nga giulohan ni Senior Police Officer 4 Reynaldo Ramos, walo ka basiyo sa bala sa .45 kalibre nga armas ang napalgan sa lugar.
Gisubay pa sa kapolisan ang impormasyon gikan sa lugar nga nalambigit sa ilegal nga drugas ang biktima ug giingong wala kini maka-remit sa halin niini hinungdan nga kini gibalikan ug gipatay.
Sa laing bahin, patay usab ang usa ka habal-habal driver sa wala matino nga suspetsado human kini mamasahero sa Saint Jude Acres corner N. Bacalso Ave, Brgy. Bulacao Pardo. Ang biktima nailhan nga si Jeremias Siago, 49, residente sa Saint Jude Compound Phase 3 sa Climaco Street.
Matud sa usa pa ka habal-habal driver, nikalit lang sa pagduol gikan sa luyo ang suspetsado ug nipabuto sa makadaghang higayon ngadto kang Siago.
Gidali pagdala sa mga concerned citizens sa Cebu City Medical Center gamit ang ambulansya sa barangay apan kini wa na kaabot ug gideklarar nga dead on arrival sa attending physician.
Matud pa sa Cebu City Police Office, Homicide Section, wala pa matino ang motibo sa pagpatay sa biktima ug padayon pa ang imbestigasyon bahin niini. (BANAT NEWS)