Porter, helper gipamusil patay

CEBU, Philippines - Patay sa managlahing pagpamusil nga nahitabo sa Dakbayan sa Sugbo ang duha ka lalaki sa nakalabay nga adlaw diin drugas ug personal nga motibo ang gisubay sa kapulisan.

Pasado alas 10 sa nakalabay nga buntag, patay ang 35-anyos nga porter sa pantalan nga si Danilo Utlang human kini gipusil sa iyang silingan sa Sitio Silangan I, Barangay Tinago samtang ang suspek giila nga si Joebert Abarquez, 28.

Matud ni Police Officer 2 Nemesio Dinopol, imbestigador sa homicide section sa Cebu City Police Office, nga samtang nagbarug sa gawas sa ilang balay ang biktima, kalit lang kini giduol sa suspek ug gipusil sa makadaghan nga higayon.

Ang kapuyo sa biktima ang dali nga nidala sa tambalanan apan nakabsan gyud kini sa kinabuhi.

Si Dinopol niingon nga posibleng personal nga bikil ang hinungdan sa pagpamusil base sa ilang nakuha nga impormasyon.

Samtang pasado alas 9 sa gabii, patay sab ang usa ka construction helper human gipusil sa gunman nga nagsakay og motorsiklo sa Holy Name, Mabolo.

Sa imbestigasyon sa kapolisan nasayran nga samtang nagduwa og chess ang biktima kauban ang iyang higala kalit lang naabot ang usa ka motorsiklo nga dunay sakay nga duha ka lalaki ug ang back rider maoy ninaug dala sa iyang armas.

Nahulog ang armas sa gunman hinungdan nga nidagan paingon sa ilang balay ang biktma apan kini gisundan sa gunman ug gipusil sa tiil ug natumba.

Human nalukapa giduol kini sa gunman ug gitiwasan sa pagpusil sa makadaghan nga higayon.

Si Dinopol niingon nga personal ug drugas ang ilang gisubay nga hinungdan sa krimen human ilang nasayran nga nisurender na sab diay sa ilang barangay ang biktima human kini nalambigit sa drugas.

Apan nakakuha sab og kasayuran ang kapolisan nga dunay gikaaway ang biktima niadtong nakalabay nga adlaw. (BANAT NEWS)