Mga opisyal sa barangay gusto masakop sa GSIS
CEBU, Philippines - Gustong magpasakop sa Government Service Insurance System (GSIS) ang mga opisyal sa kabarangayan sa Dakbayan sa Sugbo kaysa usbawan lang ang ilang binuwan nga honorarium.
Si Tisa Barangay Kapitan Philip Zafra, presidente sa Association of Barangay Councils (ABC), nipasabot nga samtang gisuportahan nila ang tinguha ni Kongresista Raneo Abu nga magpausbaw sa ilang honorarium, mas bintaha gyud kun ipasakop ang mga opisyal sa barangay sa GSIS.
Gihimong sanglitanan ni Zafra ang bag-o pang namatay nga si Punta Princesa barangay kapitan Jose Navarro nga bisan og nakaserbisyo og dul-an sa 50 ka tuig sa barangay apan wala gyud kini benepisyo nga nadawat gikan sa kagamhanan.
Gusto gyud unta ni Zafra nga ang mga opisyal sa barangay hatagan gyud og sweldo ug dili kay yano lang nga honorarium. Dunay mga barangay nga gagmay ra kaayo ang maabot nga honorarium nga ihatag sa ilang mga opisyal tungod sa kakuwang og budget.
Atol sa sesyon sa konseho sa siyudad niadtong Martes, ang balaudnon nga giduso ni Abu sa Kongreso gisuportahan sa mga konsehal sa dakbayan.
Kung ang balaudnon ni Abu maaprobahan ug mahimong balaod, ang mga opisyal sa barangay mahatagan na og arang-arang nga kantidad sa honorarium. (BANAT NEWS)
- Latest
