Tribunalo wa namasangil sa mga politiko

CEBU, Philippines - Gihimakak sa pangulo sa Provincial Environment and Natural Resources Office ang taho nga may mga politiko nga nalambigit sa illegal mining ug quarry operations.

Si Baltazar Tribunalo nihimo sa katin-awan dihang gipatawag siya sa Provincial Board ug gisukitsukit kabahin sa iyang gibutyag nga adunay  kongresista, board member, mayor, konsehal ug kapitan sa kabarangayan nga nalambigit sa maong ilegal nga operasyon.

Matud sa taho nga ang mga tag-iya sa small quarry walay mga license to operate apan padayon kini sa ilang ilegal nga kalihukan tungod kay gipaluyuhan kini sa mga politiko.

Si Bokal Raul Bacaltos niduso og resolusyon sa pagpatawag kang Tribunalo aron maklaro ang maong pasangil.

Apan matud ni Tribunalo nga misquoted lang siya sa maong report.

Gipasabot ni Tribunalo nga nitambong siya sa road show sa Philippine Extractive Industry Transparency Initiative (PH-EITI) niadtong Agosto 24.

Matud ni Tribunalo nga atol sa workshop, natahasan siya sa iyang grupo nga mo-report sa mga issues and concerns apan “generic” ang iyang pagkasulti ug wala nagtumbok sa Sugbo. Si Tribunalo nangayo og pasaylo sa hunta probinsiyal diin wala usab siya magdahum nga mogawas sa balita ang nahitabo sa workshop.  (BANAT NEWS)