CEBU, Philippines - Gumikan sa walay hunong nga kampanya batok kriminalidad ilabi na sa drugas, nagdasok na karon ang mga piniriso sa nagkadaiyang selda sa kapolisan sa Dakbayan sa Sugbo.
Ang director sa Cebu City Police Office, Senior Supt. Joel Doria, niingon nga sa pagkakaron ilang gipaspasan nga mahatagan na og commitment order ang mga piniriso aron mahatud na sa Cebu City Jail ug moluag na ang selda sa mga police stations.
Sukad gipatuman ang Oplan Double Barrel ug Oplan Tukhang, niabot na sa 1,324 ka tawo ang nadakpan sa Dakbayan sa Sugbo gumikan lang sa kaso sa drugas ug walay labot ang ubang krimin.
Apan gipasabot ni Doria nga bisan og naghuot na ang mga selda, dili gihapon sila moundang sa pagpanakop ug mas ila pa pahugtan ang pagsikop ug paghimo sa mga operasyon.
Sigun pa sa opisyal nga daghan pa nga nalambigit sa drugas ang padayon nila karong gipanid-an ug sunod nila nga target hinungdan nga dili gyud sila moundang sa ilang trabaho. (BANAT NEWS)