Anti-dengue Task Force nilihok na

CEBU, Philippines - Nilihok na ang Anti-Dengue Task Force sa dakbayan sa Talisay aron maoy motutok sa pagpuhag sa mga lamok nga nagdala og dengue.

Si Mayor Eduardo Gullas nihimo sa executive order aron sa pagpalihok sa maong grupo aron mapaspasan pagtubag ang mga lamok nga nagdala og sakit sa katawhan.

Ilang gisugdan sa pagbansay ang 12 ka empleyado ug gihimo kini nila nga co-terminus aron epektibo gyud sila sa kinatibuk-ang termino sa mayor. Nisuroy na sab sila sa mga barangay ug gipahibawo nga motira unya sila og larvaecides ngadto sa mga kanal o tubig nga nagpundo kay mao kini ang paboritong itlogan sa mga lamok nga nagdala og dengue.

Samtang si Konsehal Richard Francis Aznar, ang chairman sa Committee on Health, nipapasar og resolusyon sa konseho aron sa pagpangayo sa mayor og multicab aron mapaspasan pa ang trabaho sa Anti-dengue Task Force.

Sa pagkakaron nga wala pay magamit nga sakyanan ang task force, ila unang gigamit ang ambulansya sa pagsuroy-suroy sa matag barangay.

Asoy pa ni Aznar nga kun padayon nilang gamiton ang ambulansya basin og wala na sab unya’y magamit alang sa emerhensiya.

Sa nasayran, ang dakbayan sa Talisay aduna na’y natalang unom ka patay og 400 ka kaso sa dengue niining tuiga. 

Si Aznar nanghinaut nga ilang mapamenusan karong hinapos nga buwan ang kaso sa dengue sa dakbayan. (BANAT NEWS)