CEBU, Philippines - Sa kinatibuk-an, nadesisyonan sa Korte Suprema kagahapon nga ipalubong si kanhi Presidente Ferdinand Marcos sa Libingan ng mga Bayani nga anaa sa dakbayan sa Taguig.
Atol sa press briefing ni court spokesperson Theodore Te kagahapon niingon kini nga ang mga mahistrado nibotar og 9-5 aron i-dismiss ang tanang petition bahin sa pagsupak sa pagpalubong ni Marcos sa Libingan ng mga Bayani.
Gumikan sa dismissal sa mga petition, ang status quo ante nagmando sa Department of National Defense nga mangandam na sa paglubong ni Marcos sa lubnganan sa mga bayani.
Sila si Associate Justices Estela Perlas-Bernabe, Lucas Bersamin, Arturo Brion, Leonardo-De Castro, Mariano Del Castillo, Jose Mendoza, Diosdado Peralta, Jose Perez, ug Presbitero Velasco Jr. ang nisanong nga i-dismiss ang mga petition samtang sila si Chief Justice Maria Lourdes P. A. Sereno ug Associate Justices Alfredo Benjamin Caguioa, Antonio Carpio, Marvic Victor Leonen, Francis Jardeleza ang nisupak. Samtang si Justice Bienvenido Reyes ni-abstain sa pagbotar.
Matud sa desisyon sa Supreme Court nga ang desisyon ni Presidente Rodrigo Duterte sa pagpalubong sa patay’ng lawas ni Marcos sa Libingan ng mga Bayani wala makalapas sa balaud. Si Albay Rep. Edcel Lagman, usa sa mga petitioner batok sa pagpalubong sa gipalagpot nga diktador niingon nga girespeto niya ang desisyon sa korte apan naglibog kun nganung kasagaran sa mga mahistrado ang nitugot niini.
Samtang si kanhi Bayan Muna party-list Rep. Neri Colmenares kinsa usa sa mga biktima sa torture sa Marcos administration niingon nga magpadayon ang pagbatok sa pagpalubong.
Matud niya nga mopasaka sila og motion for reconsideration sa maong desisyon sa Supreme Court ug suwayan nga kumbinsihon ang president nga dili na lang idayon og lubong si Marcos sa Libingan ng mga Bayani.
Dinhi sa Sugbo, sa DYLA interview ni Ret. Judge Meinrado Paredes kinsa usa sab sa mga nabiktima sa Martial Law niingon nga nasakitan siya sa maong desisyon.
Sama ni Colminares, motabang usab siya pagsupak sa nahimong desisyon sa Korte Suprema nga iyang gihulagway nga wala motan-aw sa history sa nasud.
Wala mohatag sa iyang komento si Bise Gob. Agnes Magpale apan siya nanghinaut nga ang maong desisyon makapaayo sa tanan ug mao usab ni ang iyang pag-ampo. Uban sa taho sa philstar.com (BANAT NEWS)