Budget hearing sa Capitol sunod semana
CEBU, Philippines – Gikatakda nga sugdan sa hunta probinsyal ang pagtuki sa 2017 proposed budget nga giduso ni Gobernador Hilario Davide III nga balor og P3.6 bilyones.
Matud ni Bokal Miguel Antonio Magpale, chairman sa committee on budget and appropriations sa hunta probinsiyal, nga iya na nga nadawat ang proposed budget.
Matud ni Magpale nga ilang gitakda sa ika-duhang semana sa Nobiyembre ang budget hearing gikan sa Martes ug posible pa kining maabtan sa sunod pa gyud nga semana.
Ilang tukion pag-ayo ang gipangayo nga budget sa tagsatagsa ka departamento sa Kapitolyo.
“Base on the budget last year, we will ask respective nganong certain items nga underspent ba or naay kuan nga medyo nakulangan nga angay pun-an,” matud ni Magpale.
Hinoon base sa iyang pagsusi sa giduso nga budget, walay kontrobersiyal sa gipangayo nga pondo sa mga departamento sa Kapitolyo.
Ang giduso nga proposed budget mas taas og P175 milyones karong tuiga nga moabot sa P3.4 bilyones.
Kinadak-an nga gigahinan og pondo ang health services nga moabot sa P881.9 milyones alang sa hospital operations ilabi na sa pag-upgrade sa duha ka provincial hospitals sa Dakbayan sa Carcar ug Danao. - /GMR) (BANAT NEWS)
- Latest
