Kaluha patay sa aso

CEBU, Philippines – Kaluha nga Filipino-British nga 3-anyos ang nakalas human nalumos sa aso sa dihang nasunog ang ilang panimalay diha sa Acacia Place Subdivision sa Brgy. Labangon ning Dakbayan sa Sugbo, samtang ang inahan ug yaya sa mga bata nagpabilin karon sa pribado nga tambalanan human naangol sa maong sunog.

Ang nakalas naila nga sila si Elaine Margaret Myatt ug Philet Myatt, managkaluha nga babaye ug lalaki. Samtang nalandig sa tambalanan ang ilang inahan nga sila si June Estallila Myatt, 35, ug ang yaya nga si Lovelyn Estender, 18.

Matud pa ni Chief Inspector Rogelio Bongabong, Fire Marshall sa Dakbayan sa Sugbo nadawat nila ang maong alarma alas-2:55 sayo kagahapon sa kaadlawon.

Matud pa niya nakadungog ang roving guard og buto gikan sa panimalay sa mga Myatt ug dali kining nanawag sa kabomberohan. Sumala pa ni Bongabong, base sa ilang imbestigasyon posibleng nagagikan ang kalayo sa linya sa aircon nga nidakop sa mga kurtina didto sa sala.

Dugang pa ni Bongabong, nakalingkawas ang inahan kay nakaambak kini sa terrace sa second floor, samtang ang mga bata nabiyaan kini sa ilahang kwarto nga wala malakip og kasunog, apan gituohan nalumos sila sa sobrang aso samtang nangatulog.

Suway pa unta nga gidala sa Cebu City Medical Center ug pribado nga tambalanan ang mga bata apan gideklarar sila sa nga patay na.

Gitug-an ni Bongabong  ipatawag nila ang nanimuyo sa panimalay lakip ang nag- duty nga guwardiya aron klaruhon kun asa gyud nagsugod ang sunog.

Nakontrolar nila ang maong sunog alas-3 kinse sa kaadlawon ug hingpit nga na-fire out alas 4:04 na sa kaadlawon ug gibana-bana nilang P2 Milyones ang structural damages niini. Ang mga classmates sa inahan sa mga bata sa high school nga nahinabi sa Banat News, nitug-an nga nasubo sila sa maong panghitabo ug dili sila makatuo sa gidangatan sa ilang higala nga buotan ug hilumon.

Si Lita Belacho ang vice-president sa Homeowners Association nitug-an sa Banat News, wala gayud siya personal nakaila sa inahan sa mga bata apan nasubo siya kay kanunay niyang makita ang mga bata nga moagi sa ilang balay ug makighagwa kaniya.

Matud ni Belacho nagtuo siyang dili sa ilahang dapit ang maong sunog dihang nangabot ang mga bombero kay naa pa siyay jetlag gikan sa biyahe ug sayo na kagahapon sa buntag niya nahibaw-an ang balita.

Si Senior Fire Officer 1 Wendell Villanueva , ang tigpamaba sa Bureau of Fire nitug-an gikan Enero hangtod karon Oktubre, 33 na ka tawo ang namatay sa sunog, mas daghan karong tuiga itandi sa tuig 2015 nga upat lang ka tawo ang nakalas sa rehiyon 7. Gitug-an ni Villanueva, nag-unang hinungdan sa sunog karong tuiga mao ang electrical misuse diin overload ang linya sa kuryente.

Si Villanueva kinsa kolumnista niining pamantalaan, niawhag sa katawhan nga magmabinantayon ug kanunay susihon ang ilahang linya sa kuryente ilabi na kun aduna silay mga bag-ong appliances unya dugay na ang ilahang linya sa kuryente aron dili mag-overload. - /EIM) (BANAT NEWS)