CEBU, Philippines - Kagahapon pa lang naghuot na ang mga pasahero sa mga bus nga namalik gikan sa tagsatagsa ka probinsiya human nakaduaw sa mga lubong sa mga minahal sa kinabuhi.
Kini gumikan kay balik sa trabaho na karong adlawa bisan maoy naandan nga adlaw nga tingdagkot sa mga lubong sa probinsiya.
Hinuon ang kadagkuan sa Cebu South Bus Terminal ang nangandam na daan sa pagpamalik sa mga tawo sa siyudad.
Matud sa operations manager sa CSBT, Joey Herrera, nga niadtong Sabado nidagsa ang mga pasahero nga namauli alang sa Kalag-kalag.
Mapasalamaton siya nga hapsay ang terminal tungod kay ang mga pasahero nituman sa mga lagda nga gipatuman.
Giingong dunay lima ka bag nga nabiyaan sa mga pasahero niadtong Sabado hinuon nauli usab kini sa mga tag-iya ug walay mga nireklamo nga nawagtangan sila og mga butang.
Wala usab nag-ilogay ang mga pasahero sa kasakyan tungod sa kadaghan sa biyahe sa mga bus.
Matud ni Herrera nga niabot sa 800 ka biyahe sa bus ug mini-bus niadtong adlawa ug gani wala nagamit sa CSBT ang upat ka 60-seater nga Kaoshiung bus nga giandam sa higayon nga magkuwag og mga bus.
Ang 35-seater nga coaster sa probinsiya niadtong Sabado ang nagamit sa duha ka biyahe paingon sa Lungsod sa Argao ug Dakbayan sa Carcar.
Ang mga pasahero nga nisakay sa coaster libre sa pamasahe apan giseguro sa pagpasakay niini ang mga senior citizens, mabdos ug persons with disability.
Sa pagpamalik sa mga pasahero, hugot nga gibantayan sa mga tinugyanan sa terminal aron malikay sa disgrasya sa ilang pagkanaug sa bus.