Bag-ong sakyanan patungan og dako’ng excise tax

CEBU, Philippines - Pabor si Cebu City Mayor Tomas Osmeña sa sugyot sa Department of Finance nga patungan og dako kaayong excise tax kadtong mga mopalit og bag-ong sakyanan.

Nakasabot si Osmeña nga ang tumong ni Finance Secretary Carlos Dominguez III, gawas nga makakolekta og buhis ang kagamhanan, mao ang pag-discourage sa katawhan nga mopalit pa og dugang mga sakyanan.

Apan daghan ang niingon nga kun maaprobahan kining maong sugyot ni Dominguez ang mahitabo mao nga agwantahon na lang sa mga tawo ang pagmentinar sa ilang daang sakyanan bisan og magbuga na kini og aso nga makadaot sa kalikupan.

Si Osmeña niingon nga mas nindot gyud nga ang excise tax nga makolekta sa mga mopalit og sakyanan, ihatag unta ngadto sa mga local government units aron magamit sa pagpanindot sa ilang traffic systems.

Dinhi sa Sugbo dugay ra nga nasinati ang grabeng problema sa trapiko tungod sa pagdaghan sa mga sakyanan apan wala mapalapdi ang mga karsada ug walay dugang karsada nga gihimo.

Kun mahimoan og balaod ang sugyot ni Dominguez, ang mga mopalit og sakyanan nga ang kantidad ubos sa P600 mil, patungan kini og excise tax nga bali’g singko porsiyento.

Apan ang kantidad sa excise tax mosaka na ngadto sa 20 porsiyento kun ang sakyanan nagkantidad na og sobra sa P600 mil ngadto sa P1.1 million.

Mosamot na og kamahal ang sakyanan nga nagkantidad og P1.1 milyones ngadto sa P2.1 milyones kay 40 porsiyento na nga excise tax nga ipatong ug kun ang sakyanan nagkantidad og subra sa P2.1 milyones, ang excise tax nga ipahamtang 60 porsiyento, kun subra sa usa ka milyon ka pesos.