Disgrasya sud sa sam-ang lakip sa gibantayan

CEBU, Philippines - Nipahigayon og inspeksiyon ang Cebu City Disaster Risk Reduction and Management Office (CCDRRMO) sa mga sam-ang.

Katambayayong sa CCDRRMO ang Bureau of Fire Protection sa ilang gihimong inspeksiyon sa Pardo Cemetery, Calamba Cemetery ug Veterans Memorial Cemetery sa Barangay Labangon.

Sigun ni Senior Fire Officer 4 Jovito Abelgad nga sagad gyud sa problema nga ilang masugatan ilabi na sa Veterans Memorial Cemetery mao nga telephone wires ang gigamit sa pagtaud sa ilang elektrisidad.

Gipasabot ni Abelgad nga delikado ang telephone wires sanglit gawas nga gamay ang wirings niini dili pa gyud kini bronse maong kuyaw kini sa sunog.

Gibutyag ni Harold Alcontin, operations officer sa CCDRRMO, nga wala nay problema sa pagpatuman sa seguridad sa mga sam-ang tungod kay stand-by na ang kapolisan, quick response team, force multipliers ug uban pa.

Hinoon dunay nakitang gamay nga problema sa Calamba Cemetery tungod kay usa ra ang entrance ug exit.

Kadtong mga manindahay ilabi na ang mga naggamit og butane ang giawhag nga magmabinantayon aron dili makamugna og disgrasya.

Gipahibawo ni Alcontin nga 24 oras ang ilang duty sa mga sam-ang hangtud na ugma.

Samtang si Konsehal Dave Tumulak nibisita sab sa mga sam-ang sa bukirang mga barangay.

Pahinumdum sa konsehal sa publiko nga kung unsay mga gidili sulod sa mga sam-ang, dili magdala niini sama sa ilimnong makahubog, gamit para sugal ug mga mahait nga hinagiban.

Ang kabomberuhan nanawagan sab alang niadtong mga mobisita sa sam-ang ug nanguli sa probinsiya nga susihon gyud kung walay nakasaksak nga kuryente sa panimalay. (/GMR)  (BANAT NEWS)