‘Tukhang’ abot sa sementeryo

CEBU, Philippines - Gisuroy sa kapolisan sa Dakbayan sa Talisay ang lima ka sam-ang sa dakbayan aron pagpahibawo sa nagpadayon nga hugot nga kampanya batok sa ilegal nga drugas.

Pinangulohan sa bag-ong hepe nga si Supt. Emerson Dante, buot nilang ipakita sa katawhan nga seryuso sila sa kampanya hangtud sa mga sementeryo.

Ilang gipahimang-noan ang mga ilegalista sa pag-undang na sa ilang kalihukan sa dili pa maundang ang ilang kinabuhi ug mabalhin ang ilang adlaw nga natawhan sa petsa 1 sa Nobiyembre.

Niadtong Sabado sa hapon, si Mayor Eduardo Gullas ang nikuyog ni Dante sa pagsuroy sa mga sam-ang ug personal nga nitan-aw sa security plan.

Kagahapon sa buntag gibisita sa direktor sa Police Regional Office-7 ang mga dagkung sementeryo sa Dakbayan sa Sugbo sama sa  Carreta.

Kauban ni Chief Supt. Noli Taliño si Cebu City Police Office director, Senior Supt. Joel Doria.

Matud ni Taliño nga hugot nga seguridad ang ilang ipatuman karong adlawa diin gipaabot ang pagdasok sa mga tawo.

Gitug-an sab niya nga walay na-monitor nga bisan unsa nga hulga sa seguridad ang kapolisan sa rehiyon apan mas hugot gihapon nga pagbantay ang ilang himoon.

Gawas sa mga mangunguot, lakip sa gibantayan sa kapolisan ang mga durugista nga mamaligya og drugas sulod sa mga sam-ang.

Sa Dakbayan sa Lapu-Lapu, mga traffic advisories ug police security ang gipakatap sugod karong adlawa hangtud ugma. Matud ni Mario Napule, officer-in-charge sa Lapu-Lapu City Traffic Management Systems, nga sirad-an ang tanang karsada padulong sa tulo ka sementeryo sa siyudad sugod sa alas 4 sa buntag hangtud ugmang adlawa.

Ang municipal cemetery, ang Catholic cemetery sa Humay-Humay, Barangay Gun-ob ug Mactan Island Memorial Garden sa Marigondon ang mga sementeryo sa siyudad.

Dunay parking area sa mga pribadong sakyanan kilid sa Hoops Dome.

Ang mga pangpublikong jeep nga gikan sa Lungsod sa Cordova nga molahos sa Dakbayan sa Mandaue ug sa Manuel L. Quezon Road sa Barangay Pusok mahimong makaagi sa A. Tumulak Street padulong sa S. Osmeña Street ug dalan Maximo V. Patalinjug sa Barangay Pajo. Subay niini, nagkanayon sab si Police Senior Superintendent Rommel Cabagnot, director sa Lapu-Lapu City Police Office, nga kapin 500 ka tawo ang gipakatap alang sa  paghatag og hugot nga seguridad.

Kini gilangkuban sa 317 ka polis, 100 ka force multipliers, 20 ka sakop sa Philippine Air Force ug 70 ka tawo gikan sa City of Lapu-Lapu Allied Force (CLAF).

Mga assistance desks ang gipangbutang sab sa matag sementeryo ug nagpakatap sab sila og mga flyers sa mga “Do’s and Don’ts” sa kalag-kalag ug nagbutang sab og tarpaulins nga dunay parehas nga mensahe.

Sa laing bahin, sugod karong adlawa wala nay gitugutan nga makapamintal sa ilang mga nitso tungod kay daghan na ang mga tawo ug bawal sab makasulod ang mga mahait nga hinagiban, mga palita, pusil, dagku nga sound systems, ilimnong makahubog ug sugal.

Gitug-an sab ni Taliño nga ilang ilakip sa pag-ampo ang mga kauban nilang nalakip sa pagkamatay sa mga operasyon ug sa mga na-tukhang nga nisukol ug maoy panghinaut niya nga ilakip sila sa pag-ampo sa mga nangamatay na nga magmalampuson usab ang ilang operasyon batok sa kampanya sa ilegal nga drugas. (Jojo C. Ugdol, Christell Fatima M. Tudtud ug Rowena D. Capistrano/GMR)  (BANAT NEWS)