CEBU, Philippines - Gisugdan na sa Department of Social Welfare and Development ang mga plano labot sa mga libud-suroy ug mga namuyo kilid sa kadalanan nunot sa nagsingabot sa dagkung kalihukan gawas sa Pasko.
Matud ni DSWD-7 Regional Information Officer Leah Quintana nga ang ilang ahensiya maoy nangulo sa tigum nga gitambungan sa kadagkuan sa Dakbayan sa Sugbo, Mandaue, Lapu-Lapu ug Talisay.
Gituki ang protocol sa street children and families subay sa pagpangandam sa umaabot nga Christmas season, Sinulog ug Asean Summit nga mahitabo sunod tuig.
Si Grace Yana, social welfare officer sa children’s sector, niingon nga unang meeting pa lang nila kagahapon ug ang nahitabo ang matag LGU gipaambit kung unsay ilang mga kasinatian ug sitwasyon sa mga street children ug family ug kung unsay ilang mga resources ug capacity aron makatabang sa mga nahisgutan.
Gipasabot ni Yana nga ang Cebu City lang ang nakapresentar sanglit naa man sa siyudad ang counter program alang sa street children and families.
Nahibaw-an usab nila sa meeting kagahapon nga ubang street dwellers sa Siyudad sa Sugbo gikan sa laing lugar.
Nasabutan nga sa sunod meeting karong Nobiyembre nga ang matag LGU mohimo og profiling sa mga street children and families ug ila ipresentar ang action plan.
Dunay programa nga giandam ang DSWD-7 alang niining mga street dwellers sama sa livelihood ug educational assistance aron dili na sila magpakilimos sa kadalanan.
Kay daghan man nga mga street dwellers nga gikan sa laing lugar, nanghinaut ang DSWD-7 nga unta ang mga LGUs dunay lugar alang nila aron mahimo nila nga temporaryong kapuy-an.
Natuki usab nga kung mahimo kadtong mga street kids nga wala na gyuy pamilya dunay himoong foster home diin kabahin kini sa ilang long-term plan.
Niining nagkaduol nga Pasko, makita nga nagkadaghan na ang mga Badjao sa kadalanan hinuon matud sa DSWD nga dunay programa ang ahensiya alang kanila. (BANAT NEWS)