‘Adik’ nisunog sa balay

CEBU, Philippines - Gidakop sa kapolisan ang giingong adis-adis nga nisunog sa ilang panimaye ug niangin sa laing upat sa Sitio Luy-a, Lawaan II, Dakbayan sa Talisay kagahapon sa buntag.

Ang gisikop mao si Noel Velasco, 23-anyos, nga nagpuyo sa nahisgutang lugar.

Si Chief Insp. Randy Mendaros, hepe sa kabomberuhan, nibutyag nga ilang nadawat ang alarma mga alas 10 sa buntag ug nakontrolar sud sa 15 minutos.

Gibana-bana nga moabot lang sa P30 mil ang danyos tungod kay ginama sa light materials ang mga nasunog nga panimaye.

Nasayran nga nagsugod ang kayo sa kwarto ni Noel nga nahimutang sa ikaduhang andana sa panimaye ni Seferina Velasco.

Ang laing anak ni Seferina nga ila ra sab silingan maoy nitabang sa iyang inahan nga mogawas sa ilang panimaye.

Si Noel ang gisikop human kini niangkon nga siya ang nagsunog sa ilang panimaye ug nitug-an sa mga tigbalita nga iya kining gibuhat tungod kay naglagot siya sa iyang pamilya nga sigehan lang siyang gikontrahan.

Si Barangay Konsehal Edwin Etcubanes niingon nga sa niaging semana gialarma nila ang suspek sa pagdala og kutsilyo tungod kay aduna siyay kontra nga ilang silingan.

Ang inahan sa suspek mismo ang niangkon nga ang iyang anak tiggamitan og ginadiling drugas.

Ang suspek niingon nga mosuyop gyud siya apan niundang sukad nilingkod si Presidente Rodrigo Duterte.

Ang suspek ang gitanggong na sa bilanggoan samtang nagpaabot nga pasakaan og kaso. (BANAT NEWS)