5 ambulansiya plano sa CDRRMO sa Talisay

CEBU, Philippines - Tinguha sa Talisay City Disaster Risk Reduction and Management Office nga makabaton og lima ka ambulansiya.

Matud ni Alvin Santillana, pangulo sa CDRRMO, nga plano niyang mobutang og mga ambulansiya sa mga strategic nga lugar aron paspas ang ilang pagresponde. Duha ang ibutang sa may South Road Properties (SRP) samtang duha sab sa Barangay Lagtang alang sa bukirang barangay ug usa sa karaang munisipyo sa Poblacion.

Giklaro ni Santillana nga gamiton lang ang ambulansiya sa mga emerhensiya ug dili sa mga lakaw nga dili importante.

Gani nanawagan sab si Santillana sa mga konstituwente nga dili na lang mogamit sa ambulansiya kung dili grabe ang pasyente. Labi pa nga dili siya motugot nga ang ambulansiya gamiton sa pagsuroy-suroy tungod kay 24 oras kini nga i-andam sa mga panghitabo. (BANAT NEWS)