CEBU, Philippines - Duha ka mga lider dinhi sa Sugbo ang nipadayag sa ilang pagkaalarma sa pamahayag ni Pres. Duterte nga putlon na niini ang relasyon sa nasud ug sa Amerika ug adto na lang kini moduol sa China ug sa Russia.
Alang kang Gob. Hilario Davide III dili angay isalikway sa Pilipinas ang relasyon niini sa US ug malaumon siya nga pamalandungan pagbalik ni Duterte ang gibuhiang pamahayag.
Hinuon nalipay siya nga gipalig-on ni Duterte ang relasyon ngadto sa China ug Russia kay kinahanglan gyud og daghang amigo ang Pilipinas mao nga dili maayong buhian ang usa aron dawaton ang usa.
Samtang si Cebu City Mayor Tomas Osmeña nakaingon og : “I’m disturbed.” Sumala pa niya dili na bag-o kining panawagan nga ‘nasyonalismo’ kay gihimo na kini kaniadto sa mga pangulo sa nasud sama nilang Don Sergio Osmeña , Manuel Roxas ug Manuel Quezon.
Apan nabalaka siya kay ang mga Business Processing Outsourcing (call center companies) sagad gikan sa US ug kapin usa ka milyon Pilipino ang atoa na nagpuyo sa US nga posibleng makasinati og deskriminasyon didto tungod sa iyang mga pamahayag. Le Phyllis Antojado ug Decemay P. Padilla (BANAT NEWS)