CEBU, Philippines - Girelibohan sugod kagahapon sa National Capital Region Police Office (NCRPO) ang tanang police officials nga apil sa nahitabong bayolente nga pagbungkag sa mga raliyista nga anaa sa gawas sa American Embassy.
Sa report sa Philstar.com kang NCRPO director PCSupt. Oscar Albayalde niingon kini nga siyam ka opisyal sa Manila Police District ang girelibohan, lakip niini si PSSupt. Marcelino Pedrozo kinsa gitudlo sa mga saksi nga maoy nagsugo sa maong bayolente nga aksyon sa kapolisan, apan giingong gihimakak kini niya.
Kahinumduman nga niadtong Miyekules sa hapon, gatusan ka raliyista ang nagkatapok atubangan sa US embassy diin ilang gipanawagan nga papahawaon na ang mga Amerikanong sundalo sa nasud isip pagpaluyo sa laraw ni Presidente Rodrigo Duterte nga makabaton og independent foreign policy. Apan usa ka police van nag-atras-abante ngadto sa mga nagprotesta hinungdan nga ubay-ubay ang nangaangol.
Ang polis nga nagmaneho sa maong sakyanan nga si PO3 Franklin Kho, gikustodiya na sab sa NCRPO.
Matud ni Albayalde nga ang kapolisan apil si Kho, wala magdahum nga mahimong bayolente ang mga nagprotesta. Napugos matud pa si Kho nga kuhaon ang police mobile nga giingong gi-uyog-uyog ug gibunal-bunalan sa mga nag-protesta. Bisan pa man sa sirkumstansiya, dugang ni Albayalde nga ang tanang opisyal nga apil sa maong hitabo, mag-atubang og silot.
Nanawagan usab ang mga senador kang PNP chief Ronald “Bato” Dela Rosa nga imbestigaran ang maong hitabo. Gikan sa report sa Philstar.com