CEBU, Philippines - Nagbuy-od ug wala nay kinabuhi nga nakit-an sa iyang igsuon ang 33-anyos nga mag-uuma human kini gituohang naghikog ug nagpusil sa iyang ulo sa Sitio Tabon, Tubod, Lungsod sa Sibonga pasado alas 7 kagahapon sa buntag.
Apan ang imbestigador sa Sibonga Police Station, Police Officer 2 Ederlino Bacusmo, nga nahinabi sa Banat News niingon nga wala sab nila gipadaplin ang posibilidad nga dunay foul play ang hitabo hinungdan nga padayon ang ilang imbestigasyon.
Matud ni Bacusmo nga sa wala pa nakita nga nagkadugo si Gary Sarda, una kining nakakita og lalis sa iyang igsuon nga babaye gumikan sa utang. Dihang ang bana sa iyang igsuon nakig-estorya kaniya, nahitabo ang lalis ug nikuha sa iyang .38 revolver si Sarda.
Sa kahadlok sa iyang bayaw, nikaratil kini og dagan ug gisuwayan pa kini og gukod ni Sarda kinsa nagpasalba duha ka higayon sa iyang armas apan kini gibadlong sa iyang mga igsuon.
Human nakatalikod ang iyang igsuon, ilang nadungog ang buto sa armas ug sa ilang pagsubay nahay-ad na sa yuta si Sarda kinsa dunay samad pinusilan sa agtang ug sa iyang tapad nahimutang ang pistola.
Apan sigun pa ni Bacusmo nga usa sa ilang tanghaga karon kung nganong duha lang ka basiyo sa revolver ang ilang nakuha gikan sa armas ni Sarda samtang tulo man ka buto sa armas ang nadungog sa mga tawo.
Ang igsuon ni Sarda nga nahinabi sa mga polis niingon nga human nila nakita ang lawas ni Sarda wala sab sila nakakita og laing tawo nga duol sa lawas niini.
“Kay sila ra man ang naglalis bisan og nakita nga nidagan siya pero pwede siya matawag nga person of interest, pwede pud nga naghikog ni siya, mao pa na ang atong gisubay karon,” matud ni Bacusmo.
“Kung tulo lang unta ka basiyo, wala nay problema unya kay duha ra man unya tulo ka buto ang nadungog, maong makapaduda, mao nang atong imbestigaran,” dugang ni Bacusmo.
Alang ni Bacusmo, lagmit naghikog sab si Sarda kay daw sa dunay paso ang agtang niini timailhan nga dul-it ang pagpusil sa armas. (BANAT NEWS)