Secretary Lopez: Landfill sirad-an

CEBU, Philippines -  Gimanduan ni Department of Environment and Natural Resources (DENR) Secretary Gina Lopez ang Environmental Management Bureau sa pagpasira sa Inayawan sanitary landfill.

Kini human sa iyang kinalit nga pagbisita sa lugar kagahapon dihang gipangayoan og pamahayag sa mga sakop sa media labot sa kontrobersiyal nga labayanan sa basura sa Dakbayan sa Sugbo.

Matud ni Lopez nga gidili gyud ang usa ka landfill duol sa dagat sama sa Inayawan.

Si Lopez nipasalig sa pagtabang sa komunidad palibot sa lugar pinaagi sa paghatag og kapanginabuhian ug pagbutang og waste-to-energy firm aron magamit ang nagtambak nga basura sa pagkakaron.

"We will help in fixing the place. We have the resources at the DENR to do so," matud ni Lopez.

Hangyuon usab ni Lopez si Mayor Tomas Osmeña sa pagpangita una og temporaryong kalabayan sa basura samtang andam ang DENR nga motabang sa pagpangita og permanenteng lugar alang niini.

Nag-abot si Lopez ug Osmeña kauban ni kanhi konsehal Nida Cabrera sa Inayawan dumpsite.

Si Osmeña nibasol sa mga sakop sa oposisyon sa konseho sa wala paghatag og budget aron maayo ang landfill.

Nunot niini si Lopez niawhag kang Konsehal Joel Garganera sa pagkooperar sa DENR ug sa mayor aron pagsulbad sa probolema.

"I am doing this for Cebu. I love Cebu. Cebu is very magaan to me," dugang ni Lopez

Si Garganera sa iyang bahin nipasabot nga pareho sila og tumong ni Lopez aron masulbad ang problema sa landfill.

Matud sa konsehal nga gitawagan siya ni Lopez ug matud pa gisultihan siya mahitungod sa gases apan iyang gipaabot sa Secretary nga dili kini maoy iyang concern kun dili ang leachate o duga sa basura nga giingong deretso sa dagat.

Wala masayud si Lopez nga ang landfill usa ka reclaimed land ug giingong wala mosulti ang EMB-7 sa tinud-anay nga sitwasyon sa landfill ug iyang giawhag si Lopez nga i-rectify ang maong problema.

Si Cabrera sa iyang bahin niingon nga ang problema sa Inayawan landfill masulbad gyud dungan sa pag-ingon nga subli kining giablihan dili lang aron gamiton og balik apan duna usab silay gihimo nga intervention sa mga sayop nga nahimo kaniadto sanglit dili kini mahimo nga pasagdahan lang.

Sa lain bahin, hangyuon ni Osmeña ang mga justices sa Court of Appeals nga itugot ang live coverage atol sa hearing sa petisyon tumong sa pagpasira sa Inayawan landfill.

Ang CA nitakda nga ang petition for Writ of Kalikasan nga gisang-at ni Garganera padayon sa paghusay karong Lunes sa hapon. Gikan sa The Freeman, Decemay P. Padilla ug Rene U. Borromeo (BANAT NEWS)