CEBU, Philippines - Patay ang 49-anyos nga babaye human gidunggab sa makadaghang higayon sa 64-anyos nga kapuyo samtang ni-check-in sa usa ka lodging house sa Mantuyong, Dakbayan sa Mandaue alas 7 pasado sa niaging gabii.
Si Police Officer 2 David Omambac, sa Presinto 1 sa Mandaue City Police Office, niila sa biktima nga si Mercedita Emja samtang ang suspek giila nga si Rujel Mosqueda, taga Umapad sa maong dakbayan.
Ang suspek dali unta nga nisibat apan nasikop sa panimalay sa iyang paryente sa Jugan, Lungsod sa Consolacion.
Ang suspek nagkanayon nga nagsugod ang ilang away niadto pang niaging gabii dihang iyang giapas ang biktima sa gitrabahoan nga balay-imnanan ug naaktuhan gyud kini niya nga may ka gakos-gakos nga lalaki. Iyang gibadlong apan giingong nasuko ang biktima.
Susama gihapon ang iyang naabtan sa pagka-sunod gabii hinungdan nga gihuwat nga mogawas na ug nanulod sila sa lodging house diin nahitabo ang krimen gamit ang Batangas knife sa pagdunggab sa biktima. (BANAT NEWS)