Konstraksyon sa Cotcot gipaundang sa DOLE
CEBU, Philippines - Gipaundang sa Department of Labor and Employment (DOLE-7) kagahapon ang gitrabaho nga Citi Hardware sa Brgy. Cotcot sa lungsod sa Liloan human nahugno ang konkretong bungbong niini nga maoy hinungdan sa kamatayon sa duha ka construction workers ug unom ang naangol.
Matud ni DOLE-7 Regional Director Exequiel Sarcauga nga ang work stoppage order gipagawas nila human daghang nakitang kalapasan ang mga Labor Compliance Officer kinsa maoy nag-imbestigar sa maong insidente.
Nasuta nga walay personal protective gear ang mga empleyado, walay safety personnel sa site, ang contractor walay lisensiya gikan sa Philippine Constractor’s Association of the Philippines ug uban pa.
Dugang ni Sarcauga nga adunay himuon nga clarificatory hearing karong adlawa uban ang mga representante sa contractor.
"The work stoppage order will continue until the contractor shall comply and rectify its deficiencies," matud ni Sarcauga.
Kahinumduman nga niadtong niaging Biyernes, siyam ka construction worker ang nadat-ugan sa ilang gitrabaho.
Ang mga biktima nga silang Lazaro Capa, Jr. ug Bongo Cuba gidala sa Mendero Medical Center sa lungsod sa Consolacion. Silang duha nakaangkon og grabeng kadaut sa ilang ulo. Si Capa namatay pipila ka oras human sa hitabo samtang nisunod si Cuba niadtong Sabado. Gikan sa report sa The Freeman (BANAT NEWS)
- Latest
